كهسهكێ نێزیك ژ ئوسامه بن لادن، سهرۆكێ بهرێ یێ رێكخستنا تیرۆرستییا قاعیده، یێ ل ویلایهتا نیۆجێرسى یا ئهمریكا زیندانكرى، ژ ئهگهرێ قهلهوییا وى ژ زیندانێ هاته ئازادكرن.
عادل عهبدولبارى، ب كهسهكێ نێزیك و دلسۆز یێ ئوسامه بن لادن، سهرۆكێ بهرێ یێ رێكخستنا تیرۆرستییا قاعیده دهاته نیاسین، ب تۆمهتا دهستههبوونێ د پهقینێن خویناوى یێن سالا 1998 یێن ئهفریقیا، ل ئهمریكا هاتبوو زیندانكرن، ژبهر قهلهوییا وى یا زێده ژ زیندانێ هاته ئازادكرن و نها ل وهلاتێ بریتانیا دژیت.
عهبدولبارى یێ تهمهن 60 سال، دهمێ 21 سالان د زیندانا ویلایهتا نیۆجێرسى یا ئهمریكا هاتبوو زیندانكرن ب تۆمهتا ههبوونا رۆلهكێ مهزن د پهقینێن سالا 1998 یێن رێكخستنا قاعیده كو دو بالیۆزخانێن ئهمریكا ل ئهفریقیا كربوونه ئارمانج، ژ وى ئهگهرى 224 كهسان گیانێ خۆه ژ دهست دا بوو و 12 كهس ژوان ئهمریكى بوون.
د بهلگهنامێن ئازادكرنا وى دا، لویس ئهى كاپلانى نڤیسییه، قهلهوییا تۆمهتبارى و مهزنییا تهمهنێ وى بووینه ئهگهر پهتایا كۆرۆنا مهترسیێ ل سهر وى دروست بكهن زێدهتر ژ كهسهكێ ئاسایى.
ئهو تیرۆرسته ل 9 ههیڤا چریا ئێكێ یا ئهڤساله هاته ئازادكرن، ل گۆرهى دیكۆمێنتان ژى كێشا وى 104 كلیۆگرام و 326 گرام بوون، نها ل مالا كورێ خۆه، عهبدولمهجید عهبدولبارى ل بریتانیا دژیت، ڤهگهریانا عهبدولبارى بوو بریتانیا یا دهستیرداى بوو، ژبهركو ل سالا 1997 مافێ پهنابهریێ ل وى وهلاتى ب دهست خوهڤه ئینایه، بهرى ل سالا 1999 بهێته دهستهسهركرن و رادهستى ئهمریكا بهێتهكرن.
