رێڤەبەرێ شوونورارێن پارێزگەھا دھۆکێ، د کۆنگرەکێ رۆژنامەڤانی دا ئەڤرۆ رۆژا دووشەمبی شوونوارەکێ زەرە دەشتیان کو بۆ جارا ئێکێ یە بھێتە ڤەگوھاستن، بۆ سازیێن راگەھاندنێ بەرچاڤ کر، ئەو یەک ژی بەلگەیە کو بیروباوەرێن خەلکێ دەڤەرێ بەری ھاتنا ئیسلامێ بیروباوەرێن زەردەشتییان بووینە.
دکتور حەسەن ئەحمەد قاسم، رێڤەبەرێ شوونوارێن پارێزگەھا دھۆکێ، ئاشکراکر، بۆ جارا ئێکێ یە شوونوارەکێ ب ڤی رەنگی بھێتە دیتن و نموونەکا ئێکانە یە ل سەرانسەری جیھانێ، ھەتا نوکە چ شوونوارێن ب ڤی رەنگی نەھاتینە دیتن، ئەڤ شوونوارە ل باکورێ باژێرێ سێمێلێ ب دووراتیا پێنچ کیلومەتران نێزیک چیایێ سپی ل نێزیک گوندێ (گەرماڤا) ھاتیە دیتن، ئەڤ کارە ژی ژ ئەنجامێ پرۆژێ پیڤانێ یێ زانکۆیا توبنگن یا ئەلمانی ل گەل رێڤەبەریا شوونوارێن پارێزگەھا دھۆکێ ھاتیەکرن.
ل گۆرەی گۆتنا دکتور حەسەن احمد، بلنداھیا ڤێ پارچا شوونواری ١٠٩ سەنتیمەترە و پانیا وی ٥٤ سەنتیمەترە و ستووراتیا وی ٤٥ سەنتیمەترە، ئەو نەخەش بەرە وێنێ پاشایەکی یان کاھنەکێ زەرەدەشتی ل سەر ھاتیە نکراندن، جلکێن وی گەلەک جوانە و دەربرینێ ژ شێوازێن جلکێن دەڤەرێ دکەت، دیرۆکا ڤی پارچا شوونواری دزڤریت بۆ ھزارا ئێکێ پێش زائینی و ھێشتا ڤەکۆلینا بەردەوامی ل سەر ھەیە.
دکتور حەسەن ئەحمەد قاسم گۆت ژی: ل سالا ٢٠٠٥ ژی چەندین بەرمایکێن زەرەدەشتیان ل دەڤەرێ ھاتینە دیتن و ئەڤە ژی ئێک ژ بەلگەیێن دیە کو بەری بیروباوەرێن ئیسلامێ بھێنە دەڤەرێ، بیروباوەرێن زەرەدەشتی ل دەڤەرێ ھەبووینە، شوونورارێن زەردەشتییان پێشتر ھاتینە دیتن ل سنۆرێ پارێزگەھا دھۆکێ ھەتا ئامەدا باکورێ کوردستانێ بەرمایکێن شوونوارێن زەردەشتیان ھەنە، بەلێ ب ڤی شێوازی کو مرۆڤ دشێت ڤەگوھێزیت ئەڤە ئێکەم نموونەیە ل سەرانسەری کوردستانێ دھێتە دیتن.
رێڤەبەرێ شوونواران خویاکر ژی کر، پلان ھەیە ل جھێ ئەڤ شوونوارێ ھاتیە دیتن ل پاشەرۆژێ ھندەک ڤەکۆلینێن دی بھێنە کرن بۆ پتر وەرگرتنا پێزانینان ل سەر شوونواران.
رێڤەبەرێ شوونواران گۆت ژی: رێڤەبەریا شوونواران ژ سنۆرێن خوە دەرکەفتیە و گەلەک پەیوەندیێن باش ل گەل زانکۆیێن بیانی ل ئەمریکا و ئەورۆپا ھەنە و ھەتا نوکە ل سەر کارێ خوە دبەرەوامن، ژ ئەنجامێ کارێ وان ل ئەڤسالە پتر ژ سێ ڤەکۆلینێن زانستی ل گۆڤارێن بیانی ھاتینە بەلاڤەکرن و کارکرن ل گەل ئەڤان زانکۆیان بەردەوامی ھەیە ب شێوازێ ئۆنلاین.
رێڤەبەرێ شوونواران دەست خوەشی ل ھێزێن ئێمناھیێ ل پارێزگەھێ کر بۆ پاراستنا جھێن شوونواری و گۆت: رێڤەبەریا شوونواران ژی ب گەلەک شێوازان کارێ پاراستنا شوونوران دکەت، ژبەرکو شوونوار وەکو زارۆیەکێ بچووکن و پێدڤی ب سەخبێریا بەردەوامن و رەوشا ئابووری رێکێ نادەت وەک پێدڤی سەخبێری بۆ بھێتەکرن و ئەڤە وێ چەندێ ناگەھینت کو دێ ژناڤچن، بەلێ پێدڤی ب سەخبێریا بەردەوامن.
خانی نیوز، سالار محەمەد دۆسکی:
