ب ھاریکاری و پشتەڤانییا سەرکردێن سەربازی و پارێزگارێ سەپاندی یێ کەرکووکێ، عەرەبێن ھاوردە ل کەرکووکێ ل سەدان ھزار دونەمێن زەڤیێن چاندنێ و خانی و مالێن وەلاتیێن کورد ل کەرکووکێ داگیرکرینە.
محەمەد ئەمین، ئەندامێ جڤاتا نوونەرێن ئیراقێ ژ فراکسیۆنا پارتی و ئەندامێ لژنا پەرلەمانی بۆ کێشەیا داگیرکرنا زەڤیێن جۆتیارێن کورد بۆ خانی نیوز راگەھاند، لژنەیەک ژ جڤاتا نوونەرێن ئیراقێ ب نوونەراتییا ھەموو پێکھاتەیان ھاتیە پێکئینان د گەل نوونەرێن لژنا چاندنێ و بەرگریێ، ئەڤرۆ دێ د گەل بەرپرسێن ئێمناھیێ و ئیداری یێن کەرکووکێ کۆم بن.
محەمەد ئەمین گۆت ژی: د کۆمبوونا خوەدا دێ کێشەیا زەڤیێن جۆتیارێن کورد ل دەڤەرێن پەلکانە و داقووق و گوندێن دەردۆرا وان گۆتوبێژ کەن، لێ ئاریشە وەسا بساناھی نینە ب کۆمبوونەک و دو کۆمبوونان چاەر بیت، ھەکە چارەسەریا ب ئێکجاری ژی دڤێت پیدڤییە ماددەیێ سەد و چل یێ دەستوورێ ئیراقێ بھێتە بجھئینان.
ل گۆرەی گۆتنا ئەندامێ جڤاتا نوونەرێن ئیراقێ، داتایێن جودا ل دۆر داگیرکرنا زەڤیێن جۆتیارێن کورد ژ ئالیێ عەرەبان ڤە ھەنە، یێن دوبارە پشتی خیانەتا شازدەی ئوکتوبەرێ ڤەگەریاینە کەرکووکێ.
محەمەد ئەمین، ئەندامێ جڤاتا نوونەرێن ئیراقێ و ئەندامێ لژنا پەرلەمانی بۆ کێشەیا داگیرکرنا زەڤیێن جۆتیارێن کورد دوپات کر، پشکەکا سەرکردێن سەربازی و پارێزگارێ سەپاندیێ کەرکووکێ پشتەڤانیێ ل وان عەرەبان دکەن یێن زەڤی و مالێن کوردان ل کەرکووکێ داگیر دکەن.
محەمەد ئەمین گۆت ژی: ل سەر بەرھەم سالاح، سەرۆککۆمارێ ئیراقێ پێدڤییە دەستووری بپارێزیت، ئەوا نھا ل کەرکووکێ ژی روو ددەت بنپێکرنا دەستووری یە و پێدڤییە دوپاتیێ ل بجھئینانا ماددەیێ سەد و چل بکەت.
خانی نیوز، عەزیز ھەورامی
