سەرۆکوەزیرێن ئسرائیلێ دگەل بەرپرسێن ھەردو وەزارەتێن بەرگری و دارایی کۆم بوویە و بەرھەڤیێن ھێرشەکا پێشبینیکری ل دژی ئیرانێ گۆتوبێژ کرینە.
ل گۆرەی ئاگاھییێن تێلەڤزیۆنا فەرمی یا ئسرائیلی، بنیامێن نەتەنیاھۆ د گەل بەرپرسێن وەزارەتێن بەرگری و دارایی کۆم بوویە و پرسا ڤەگۆھاستنا پارەی ژ بنگەھێن ھاوارھاتنێ بۆ بەرھەڤیێن ھێرشا پێشبینیکری ل دژی ئیرانێ گۆتوبێژ کرییە، بریارە سوبە رۆژا چارشەمبی ژی جڤاتا وەزیرێن ئێمناھیێ یا ئسرائیلی ل دۆر وێ پرسێ کۆم بیت.
ژ ئالیێ خوەڤە ئەفیف کۆخافی، سەرۆک ئەرکانێ سوپایێ ئسرائیلێ ل حەفتییا بووری دوپات کربوو کو وان فەرمان ل سوپایێ خوە کرییە پلانەکێ بۆ ھێرشکرنا ل سەر ئیرانێ دارێژن.
بەرانبەر وێ یەکێ بەرپرسەکێ ئیران یێ مەزن ئاشکرا کرییە، داخویانیێن سەرۆک ئەرکانێ ئسرائیلێ ل دۆر دارێشتنا پلانەکێ بۆ ھێرشکرنا ل سەر ئیرانێ، ب تنێ شەرەکێ دەروونی یە و دوپات کر، تەھران دەستان داناھێلیت بۆ بەرسینگگرتنا ھەر ھێرشەکێ.
