كارمه‌ندێن ساخله‌میێ ل دهۆكێ ڤاكسینێ كۆرۆنایێ وه‌رگرت

کارمەندێن ساخلەمیێ یێن پارێزگەھا دھۆکێ ڤاکسینێ سینۆ فارما یێ چینێ یێ دژی ڤایرۆسێ کۆرۆنایێ وەرگرت.

د. ئەفراسیاب موسا یونس، رێڤەبەرێ گشتییێ ساخلەمییا پارێزگەھا دھۆکێ دیارکر، ژ وان پێنج ھزار ڤاکسینێن دژی کۆرۆنایێ یێن ژ وەلاتێ چینێ بۆ ھەرێما کوردستانێ ھاتینە ھنارتن بەھرا پارێزگەھا دھۆکێ ٩٢٠ ڤاکسینن ژ بۆ ٤٦٠ کەسان ھێتە دانان کو ھەر کەسەک دێ دو جاران وی ڤاکسینی وەرگریت.

د. ئەفراسیاب گۆت ژی: ڤاکسینێ نوکە گەھشتیە پارێزگەھا دھۆکێ ل دەسپێکێ دێ بۆ وان کەسان بیت یێن د ناڤا نەخۆشخانێن کۆرۆنایێ دا کارکرین و کەسێن ب تەمەن یێن ژیێن وان دناڤبەرا ٥٠ بۆ ٦٠ سالیێ دا.

ئەفراسیاب موسا دیارکر ژی، ئەو ڤاکسینێن نھا ھاتینە تەرخانکرن ژ ئالیێ ھەردو وەزارەتێن ساخلەمی یێن ئیراقێ و ھەرێما کوردستانێ تایبەتن بۆ کارمەندێن ساخلەمیێ.

رێڤەبەرێ گشتییێ ساخلەمییا پارێزگەھا دھۆکێ دیارکر، حکومەتا ئیراقێ گرێبەست دگەل ھەردو کۆمپانیێن ئەسترا زینیکا و فایزەر چێکرینە بۆ بدەستڤەئینانا ڤاکسینێن پێدڤی بۆ ھەموو ئیراقێ، لێ تا نھا دیار نینە کەنگی دێ گەھنە ئیراقێ و ھەرێما کوردستانێ و گۆت ژی: ل دووڤ زانیاریێن وان ڤاکسینێ ئەسترا زینیکا د دەمێ پازدە رۆژان دا دێ ل ئیراقێ ھێتە بەلاڤکرن.

خانی نیوز: ئاریان بەرواری