به‌ریتانیا: ئه‌ركێ ئاینده‌یێ وان ل ئیراقێ ب تنێ مه‌شقكرنه‌

به‌ریتانیا ئاشكرا كر، هه‌تا نوكه‌ وان راهێنان ب‌ زێده‌تر ژ 120 هزار پێشمه‌رگه‌یان و سه‌ربازێن ئیراقی كرینه‌.‌

وه‌زاره‌تا به‌رگرییا به‌ریتانیا د‌ راپۆرتا ساڵانه‌یا خوه‌ دا راگەهاند: ل ‌ده‌ستپێكا شه‌ڕێ داعشێ هه‌تا نوكه‌ وان مه‌شق و راهێنان ب زێده‌تر ژ 120 هزار پێشمه‌رگه‌یان و سه‌ربازێن سوپایێ ئیراقێ كرینه‌.‌

هه‌روه‌سا د راپۆرتا وه‌زاره‌تا به‌رگرییا به‌ریتانیا دا ئاماژە هاتییه‌ كرن، به‌ریتانیا وه‌كو ئه‌ندامه‌كا كارا یا هه‌ڤپه‌یمانییا ناڤده‌وڵه‌تی یە رۆڵه‌كێ بلند هه‌بوویه‌‌ بۆ دابینكرنا زانیاریێن نهێنی و چاڤدێریكرنێ و ب‌ ئارمانجكرنا پێگه‌هێن داعشێ ل ئیراقێ و سوریێ.

ژلایه‌كێ دیڤه‌ و پێدڤیاتییا ب مەشق و راھێنانێن ھێزێن ئیراقێ، رێكخراوا ناتۆ راگەهاند: ئه‌ركێ ئاینده‌یێ هه‌وه‌ ل ئیراقێ ب تنێ مه‌شقكرنه‌ ب هێزێن وى وه‌ڵاتى و شه‌ڕكرن نینه.‌

یانز شتۆڵتنبێرگ، سكرتێرێ گشتیێ ناتۆ، پێش ده‌ستپێكرنا كۆمبوونێن وه‌زیرێن ده‌رڤه‌یا ئه‌ندامێن ناتۆیى، ئه‌ركێ داهاتیێ  رێكخراوێ ل‌ ئیراقێ ئاشكرا كر.

سكرتێرێ گشتیێ ناتۆ سه‌باره‌ت ب‌ رۆڵێ وان ل ئیراقێ ئه‌وێن گۆتین ل ئیراقێ هه‌مان رۆڵێ ئه‌فغانستانێ دێ بیت و ئه‌و ژى دێ پێكهاتبیت  ژ مه‌شق و راهێنانكرن و‌ ب هێزێن ئه‌منیێن وى وه‌ڵاتى.

ئه‌و چه‌نده‌ ژى دیاركر، ئه‌وان دڤێت شیانێن هێزێن ئیراقێ باشتر بكه‌ن، تاوه‌كو رێگریێ بكه‌ن بۆ هندێ جاره‌كا دی داعش نه‌ ڤه‌گه‌ریته‌ ڤه‌ وى وه‌لاتى.