سهرۆكێ ههرێما كوردستانێ ئهڤرۆ پهیامهك بهلاڤكر و دیاركر: سهرهلدان دەربڕینا خوازت و باوەر و ئیرادەیا بهێز یا گەلێ کوردستانێ بوو ل پێناڤ ژیان و پاشهرۆژهكا باشتر یێ ئازاد و سەرفراز و ڕهدكرنا ستەم و زۆرداریێ. بەرهەمێ خەبات، قوربانیدانا پێشمەرگە، گهل، جهماوهر، ئێكرێزییا ئالیێن سیاسی و پێکهاتێن کوردستانێ بوو.
نێچیرڤان بارزانى، سهرۆكێ ههرێما كوردستانێ ب ههلكهفتا 31 سالیا سهرهلدانا 1991ێ د پهیامهكێدا پیرۆزباهیێن خوه ئاراستهى مالباتێن سهربلدێن شەهید و پێشمەرگەیێن قههرهمان و ههمى کوردستانێ كرن و راگههاند: سهرهلدان بۆ گەلێ کوردستانێ دهرگهههك بوو بۆ قۆناغهكا نوى یا خوه ب ڕێڤهبرنێ و دامەزراندنا سازیێن شەرعی و فەرمى یێن هەرێما کوردستانێ كو پشتى ئازادیا عیراقێ د دەستووریدا جێگیر كر، د ناڤخوه و د جیهانا دهرڤهدا ب فەرمی هاتنه نیاسین.
نێچیرڤان بارزانى ب ڤێ ههلكهفتێ دووپات كر كو پاراستنا ئازادی و دەستکەفتیێن سەرھلدانێ و مافێن دەستووری یێن ھەرێما کوردستانێ، ئەرك و بەرپرسیارهتیا ھەڤبەشا ھەمى کوردستانێ یه و وەفادارییە ژ بۆ گیانێ پاقژێ شەھیدان و ھەمى قوربانیێن رێكا ئازادیێ.
سەرۆکێ ھەرێما کوردستانێ زێدهتر دیاركر: بلا ئەڤ ههلكهفته بیته پالدەرەك ژ بۆ زێدەتر ب هێزكرنا گیانێ براتیێ، ب ھەڤرابوونێ، ئێكرێزی و پێکڤەژیانێ، ھەڤدوقەبیلكرنێ، لێبۆرینێ و کارکرن ژ پێناڤ ئهو ئارمانجێن کو شەھیدێن سەرھلدانێ و ھەمى شەھیدێن کوردستانێ گیانێ خوه بۆ كرینه قوربان.
نێچیرڤان بارزانى، سەرۆکێ ھەرێما کوردستانێ ل داوییا پهیاما خوه دا گۆت: دوپاتکرن و پابەندبوونا مە ب ئارمانجێن سەرھلدانێ، ب ھیڤی و ئومێد، ب باوەری و گەشبینی ژ بۆ پاشەرۆژەکا باشتر دچین و ب رێز و حورمەت ڤە ههلكهفتێن شەھیدێن سەھلدان و ھەمى شەھیدێن کوردستانێ دکهین.
