دبهردهوامییا بزاڤێن خوهدا بۆ لێك نێزیككرنا بیر و بوچوونێن لایهنێن سیاسى و پێكهاتهیان بۆ ئامادهكرن و ب رێڤهبرنا ههلبژارتنێن بهێن یێن ههرێما كوردستانێ، ئهڤرۆ 6-6-2022ێ، سهرۆكێ ههرێما كوردستانێ نێچیرڤان بارزانى دگهل لایهنێن سیاسى و پێكهاته و پهرلهمانتار و نوونهرێن وان كۆمبوو.
دكۆمبوونێ دا نوونهرێن پێكهاتهیان بیر و بوچوونێن خوه دهربارهى ههلبژارتنان و قانوونا ههلبژارتنان و پاراستنا مافێن وێ دیاركرن، ههروهسا دووپاتى ل گرنگییا رۆل و پشتهڤانییا سهرۆك نێچیرڤان بارزانى و سهرۆكایهتییا ههرێما كوردستانێ بۆ پاراستنا مافێن وان و رێزگرتنا بیر و بوچوونێن پهیوهندى ب مافێن وان ڤه ههى كر.
سهرۆك نێچیرڤان بارزانى پشتهڤانییا خوه بۆ پاراستنا پێكهاته و مافێن وان دیاركر، و دووپاتى ل هندێ كر كو دڤێت ههموو پێكهاته خودان بریار و بیر و بوچوون بن و رێز ل بریارێن وان بهێتهگرتن، ههروهسا سوزدا كو رێكێ نهدهت چ بزاڤ بۆ سنوورداركرنا مافێن وان ب تایبهت دههلبژارتنێن پهرلهمانێ كوردستانێ دا بهێنهكرن، و پێدڤییه هندى دشیاندابیت گرنگى ب مافێن وان بهێتهدان.
ژلایێ خۆڤه لایهنێن سیاسى و نوونهرێن پێكهاتهیان ل ههرێما كوردستانێ، سوپاسى و پێزانینێن خوه بۆ ههلویستێن سهرۆك نێچیرڤان بارزاتى دووپاتكرن، و رۆلێ وى دپاراستن و پهیداكرنا گیانێ پێكڤهژیانێ و ئێك و دوو قهبوولكرن و لێبورنا دناڤ پێكهاتهیێن گهلێ كوردستانێ دا و پاراستنا مافێن وان بلند هژمارت.
