ل بەراهییێ، د. داود ئەترووشی، باس ل هندەك ژ وان پێنگاڤان كر یێن د بیاڤێ گوهۆرینان دا ل زانكۆیێ هاڤێتین، كو ئارمانج ژێ ئەوە زانكۆ ب كارێ خۆیێ دروست راببیت و مژویلی چ تشتێن دی یێن لاوەكی نەبیت، و بزاڤ بهێنە کرن کولتۆرێن دروست و ساخلەم پتر د ناڤ زانکۆیێدا پەیداببن.
سەرۆكێ زانكۆیا دهۆكێ، هەروەسا گۆت “دەمێ مە بریار دای ببینە مامۆستا، بەرپرسیاریا پێشخستنا جڤاكی مە یا ئێخستییە سەر ملێن خۆ، هەروەسا دویڤچوونا وێ پێشڤەچوونێ یا ل جیهانێ پەیدادبیت مە یا كریە كارێ خوه”.
سەرۆکێ زانکۆیا دهۆکێ هندەک بابەتێن دی ژی ب راشكاوەیی دگەل مامۆستایان ڤەكرن، دەمێ گۆتی “رەخنە ل مە دهێتە گرتن كو ئەم نەشیاینە ب دروستی كولتۆرێ زانكۆیان بجهبینین، بەلێ ئەم شانازییێ ب زانكۆیا خوه دبەین، و پێشبینیا مە و جڤاكی بۆ زانكۆیێ پترە، زانكۆ كەواتە مامۆستا، مامۆستا ژی كەواتە زانكۆ، جڤاكی پتر ژ زانكۆیێ دڤێت و پێدڤییە ئەم د وی ئاستێ پێدڤیدا بین، و هەتا نوكە ئەم نەشیاینە وی قوتابی دروست بكەین كو پشتی دەرچوونێ پشتبەستنێ ل سەر خوه بكەت و د ڤی بیاڤیدا رەخنە ل مە دهێتە كرن، گوهۆرینێن کارگێری ب تنێ بەس نینن، دڤێت گوهورینا د پرۆگرامێن خواندنێ و شێوازێ وانەگۆتنێ و هندەك بوارێن دی ژی دا بكەین ب مەرەما پێشخستنێ و بەرهەمەكێ باشتر”.
سەرۆكێ زانكۆیا دهۆكێ، ئەو ژی دیاركر كو پلان هەنە بۆ گوهۆرینان، چ یێن کارگێری بن یان یێن زانستی، و گۆت” من باوەری هەیە زانكۆیا دهۆكێ ب شیانێن مامۆستایێن خوه، دێ شێت پێشخستنێن پتر ئەنجامدەت”.
د بیاڤێ پەیوەندیان ژی دا، سەرۆكێ زانكۆیا دهۆكێ د پەیڤا خوه دا دگەل مامۆستایان راگەهاند “مامۆستا د بیاڤێ پەیوەندیاندا دشێت رۆلێ سەرەكی بگێریت و دشێت فەندێن مەزن و پرۆژێن ئەكادیمی بۆ زانكۆیێ بدەستڤەبینیت، ب تایبەتی ژی ئەو مامۆستایێن ل دەرڤەی وەلاتی خواندین. زانكۆیا دهۆك دێ گرنگیێ دەتە ڤی بابەتی و دێ رێزێ ل ماندویبوون و خەمخۆریا وان گریت و كارێ وان ب هەروە ناچیت”.
پاشی سەرۆکێ زانکۆیا دهۆک نوینەرێن مامۆستایان داخوازکرنە لسەر ستێجێ و ب دەستقوتانان سوپاسیا هەمیان کر بۆ ئەرک و ماندیبوونا وان، ل دویڤدا سەرۆکێ زانکۆیێ و هەرسێ هاریکارێن وی د. ئەحمەد محەمەد سالح، د. لوقمان هادی حەسەن و د. مێڤان عارف عەبدولرەحمان بۆ بەرسڤدانا پرسیار و بۆچوون و تێبینی و رەخنەیێن مامۆستایان روینشتن و ئەڤ روینشتنە ژ لایێ د. نیبار بەدیع، نوینەرێ گشتی یێ مامۆستایان ڤە هاتە برێڤەبرن.
د ڤێ روینشتنا ڤەكری دا چەندین مامۆستا پشكداری دانوستاندنێ بوون و پرسیار و تێبینی و بۆچوونێن خوه پێشكێشی سەرۆكێ زانكۆیێ و هاریكارێن سەرۆكێ زانكۆیێ كرن، د بیاڤێ سیستەمێ خواندنێ و بابەتێن دیتر یێن گرێدایی وەرگرتنا قوتابیان و كارێن کارگێری ل زانكۆیێ. ل دۆر گرنگییا قەبویلکرنا رەخنێ و رۆلێ وێ د پێشڤەبرنێدا، سەرۆكێ زانكۆیێ گۆت “زانكۆ جهێ هزرا ئازاد و رەخنا ئاڤاكەرە ب ئارمانجا پێشخستنا زانکۆیێ”.
