مەسرور بارزانی پێشوازی ل بالیۆزا ئەمریكا ل عیراقێ كر

ئەڤرۆ سێشه‌مبی” مەسرور بارزانی، سەروكێ حكومەتا هەرێما كوردستانێ پێشوازی ل ئەلینا رۆمەناوسكی، بالیۆزا ئەمریكا ل عیراقێ كر.

د كۆمبوونه‌كێ دا دانوستاندن دەربارەیی پێشڤەبرنا پەیوەندیێن هەرێما كوردستانێ و ئەمریكا و چارەسەرییا ئاریشێن هەرێمێ و حكومەتا فیدرال هاتنه‌ كرن.

سەرۆكێ حكومەتێ دووپات كر، هەرێما كوردستانێ هەموو دەمان یا بەرهەڤە چارەسەركرنا ئاریشان ل گەل بەغدا ل سەر بنه‌مایێ دەستووری چارەسەر بكەت، لێ یا بەرهەڤ نینە ل ژێر چ فشار و رەوشان دەست ژ مافێن خۆ یێن دەستووری بەردەت.

ئاشكرا ژی كر، پێشكەفتنا هەرێما كوردستانێ د بەرژەوەندیا هەموو خەلكێ عیراقێ دا یە و پێدڤییە حكومەتا فیدڕال هاریكار و پالپشتا هەر دەڤەرەكا عیراقێ بیت” نەكو ئاستەنگ و ئاریشان دروست بكەت.

بالیۆزا ئەمریكا گۆت، هەرێما كوردستانێ دۆست و هەڤپەیمانەكا ب هێز یا ئەمریكایە، دووپاتی ل گرنگیا هەبوونا بنەمایێ دەستووری بۆ چارەسەركرنا ئاریشێن دناڤبەرا هەرێما كوردستانێ و بەغدا كر.