د دیدارهكێ دا سهرۆكێ ههرێما كوردستانێ نێچیرڤان بارزانى و سیناتۆرێ ناڤدارێ ئهمریكى لینزى گراهامى رهوشا عیراقێ گوتوبێژكر و دووپاتى ل پاراستنا ئێمناهى و سهقامگێرییا دهڤهرێ كر.
سهرۆكایهتییا ههرێما كوردستانێ دیاركر، ئهڤرۆ دووشهمبى 5ى تهموزا 2022ێ، سهرۆكێ ههرێما كوردستانێ پێشوازى ل سیناتورێ ناڤدارێ ئهمریكى لینزى گراهام و شاندێ دگهلدا ئهوێ ژ بالیۆزا ئهمریكا ل عیراقێ ئالینا رومانوسكى و فهرماندێ هێزا ههڤپهیمانییا نێڤدهولهتى جێنرال جۆن برێنان و ژمارهكا دپلۆماتكار و پلهدارێن سهربازى یێن ئهمریكا پێكهاتى كر، دكۆمبوونهكێ دا دانوستاندن ل دۆر رهوشا عیراقێ و پرۆسهیا وێ یا سیاسى، داوى پێشهاتێن شهرێ دژى تیرۆرێ، پهیوهندییێن ههولێر و بهغدا و دانوستاندنێن چارهسهركرنا كێشهیێن دناڤبهرا واندا و رهوشا سوریێ و پرسێن كوردان ل وى وهلاتى هاته كرن.
ل دۆڤ راگههاندنا سهرۆكایهتییا ههرێمێ، ههردوو لایهنان دووپاتى ل گرنگییا پاراستنا ئارامى و سهقامگێرییا دهڤهرێ كر، و ل سهر مهترسیا تیرۆر و سهرهلدانا داعشێ وهكو ههرهشهیهكا راستهقینه ل سهر سهقامگێرییا عیراق و سوریایێ دههڤرابوون و دووپاتى ل پاراستنا ئارامى و سهقامگێرییا دهڤهرێ كر.
ههروهسا بهیاننامهیا سهرۆكایهتییا ههرێمێ ئاشكراكر، سهرۆكێ ههرێمێ نێچیرڤان بارزانى سوپاسى و پێزانینێن ههرێما كوردستانێ بۆ پشتهڤانى و هاریكارییا ئهمریكا بۆ عیراق و ههرێمێ ل شهرێ دژى تیرۆرێ كر، و دووپاتكر كو دانوستاندن و دهستوور كلیلكا سهقامگێرى و چارهسهركرنا كێشهیێن عیراقێ و كێشهیێن ههولێر و بهغدا یه.
