وه‌زاره‌تا ده‌رڤه‌ یا عیراقێ : مه‌ داخواز كرییه‌ توركیا بالیۆزێ خوه‌ ژ عیراقێ ڤه‌كێشیت

په‌یڤدارێ وه‌زاره‌تا ده‌رڤه‌ یا عیراقێ ئه‌حمه‌د سه‌حاف راگه‌هاند، بالیۆزخانه‌یا توركیا ل به‌غدا هاتییه‌ داخستن و ئه‌وان داخوازكرییه‌ بالیۆزێ توركیا ڤه‌گه‌ریته‌ وه‌لاتێ خوه‌، و زێده‌تر دیاركر، هێرشا توركیا بۆ سه‌ر ئه‌ردێ عیراقێ بنپێكرنا رێككه‌ڤتنا عیراق و توركیایه‌، و ئه‌وان داخوازا كۆمبوونه‌كا بله‌ز یا جڤاتا ئاسایشا نێڤده‌وله‌تى كرییه‌ و ره‌نگه‌ به‌ره‌ڤ بابه‌تێن دارایڤه‌ بچن.

ئه‌حمه‌د سه‌حافى ئاشكرا ژى كر، توركیایێ رێككه‌ڤتنا دگه‌ل عیراقێ بۆ پاراستنا سنوورێن خوه‌ كرییه‌ به‌هانه‌یا ڤان هێرشان، كو توركیا دگه‌ل حكومه‌تا به‌رى نوكه‌ یا عیراقێ رێككه‌ڤتبوو ب درێژاهییا پێنج كیلۆمه‌تران بهێته‌ دناڤ ئه‌ردێ وێ دا، لێ توركیا ژ وێ رێككه‌ڤتنێ ده‌ركه‌ڤتییه‌ و ژ پێنج كیلۆمه‌تران پتر هێرشێن خوه‌ دكه‌ت.

سه‌حافى گوت ژى : لژنه‌یه‌ك ب سه‌رۆكایه‌تییا سه‌رۆك وه‌زیرێن عیراقێ مسته‌فا كازمى بۆ ڤه‌كۆلینێ ل سه‌ر هێرشا زاخۆ هاتییه‌ پێكئینان، و داخواز ژ توركیا هاتییه‌ كرن لژنه‌یه‌كێ بۆ هه‌مان بابه‌ت پێكبینیت.