ئامارێن نوى یێن كۆشتیێن شه‌رێ توركیا و په‌كه‌كێ

ناڤه‌ندا چاپه‌مه‌نى و راگه‌هاندنێ یا هێزێن پاراستنا گه‌ل ( هه‌په‌گه‌ ) راگه‌هاند، د رووبروویبوونه‌كا هێزێن په‌كه‌كێ و سۆپایێ توركیا دا ل هه‌رێما زاپ حه‌فت سه‌ربازێن توركیا هاتنه‌ كۆشتن و سێ یێن دى برینداربوون.
ل گوره‌ى راگه‌هاندنه‌كا هه‌په‌گێ كو دۆهى رۆژا 13ى ئاب به‌لاڤكرییه‌، هێزێن په‌كه‌كێ ل هه‌رێما زاپ رووبرووى سۆپایێ توركیا بوون و ژ دوو لایان هێرش كره‌ سه‌ر سۆپاى كو ب نیازبوون پێشره‌وییێ ل وان ده‌ڤه‌ران بكه‌ن و د ئه‌نجامدا حه‌فت سه‌ربازێن توركیا هاتینه‌ كۆشتن و سێ سه‌ربازێن دى برینداربووینه‌.
د به‌رامبه‌ر دا ئه‌ڤرۆ رۆژا ئێكشه‌مبى وه‌زاره‌تا به‌رگرییا توركیا كۆشتنا شه‌ش چه‌كدارێن په‌كه‌كێ ل چیایێ خواكورك و مه‌تین راگه‌هاند.
دیار ژى كرییه‌، ب هه‌ماهه‌نگییا ئۆپه‌راسیۆنێن تایبه‌ت یێن میت و سۆپایێ توركیا چوار چه‌كدارێن په‌كه‌كێ ل چیایێ مه‌تین و دوو ل خواركورك هاتنه‌ كۆشتن.
ل رۆژا 18ى نیسانا 2022ێ سۆپایێ توركیا ئۆپه‌راسیۆنا ( چنگ – قوفل ) ل ده‌ڤه‌رێن ئاڤاشین و مه‌تین وزاپ ل ناڤ ئاخا هه‌رێما كوردستانێ بۆ سه‌ر پێگه‌هێن په‌كه‌كێ ده‌ست پێكرن.
هه‌تا نوكه‌ وه‌زاره‌تا به‌رگرییا توركیا كۆشتنا 321 چه‌كدارێن په‌كه‌كێ و كۆشتنا 49 سه‌ربازان راگه‌هاندییه‌، د به‌رامبه‌ردا هه‌په‌گێ‌ كۆشتنا هزار و 561 سه‌ربازێن تورك و 77 چه‌كدارێن په‌كه‌كێ راگه‌هاندییه‌.