<h3 style="text-align: justify;"><span style="font-size: 18pt;">ئهڤرۆ ههرسێ سهرۆكایهتییێن عیراقێ بێى پشكدارییا نوونهرێن رهوتا سهدرى، دگهل سهركردهیێن هێزێن سیاسى یێن عیراقێ كۆمبوون.</span></h3> <h3 style="text-align: justify;"><span style="font-size: 18pt;">كۆمبوونا ئهڤرۆ ل سهرداخوازا سهرۆك وهزیرێن عیراقێ مستهفا كازمى بوو، و هنارتییا نهتهوهیێن ئێكگرتى ل عیراقێ جێنین پلاسخارت ژى تێدا یا پشكداربوو، و ئارمانج ژڤێ كۆمبوونێ دیتنا رێكهكێ بۆ دهركهڤتنا ژ قهیرانا سیاسى بوو، ئهنجامێن كۆمبوونێ ب ئهڤى شێوهیى هاتنه راگههاندن.</span></h3> <h3 style="text-align: justify;"><span style="font-size: 18pt;"><strong>ئێك</strong> – لایهنێن پشكدار پابهندبوونا خوه ب بابهتێن نیشتیمانى دهربرى، ههروهسا ههموو لایهن ل سهر دیتنا چارهسهرییهكێ بۆ ههموو كێشهیان ب رێكا دانوستاندنان و پشت بهستن ل سهر گیانێ برایهتى و پاراستنا ئێك پارچهییا عیراقێ و ئاسایشا خهلكى و سهقامگێرییا وهلاتى كوك بوون، ههروهسا ل سهر درێژكرنا سیستهمێ دیمۆكراسى یێ دهستوورى ههڤرابوون، كو ههموویان داخواز كر، كار بۆ پێشخستنا بهرژهوهندییێن بلند یێن نیشتیمانى و كاركرن ب گیانێ هاریكارییا دناڤبهرا ههموو رولێن نیشتیمانى دا بۆ چارهسهركرنا قهیرانا نووكه یا وهلات تێدا دبووریت بهێته كرن.</span></h3> <h3 style="text-align: justify;"><span style="font-size: 18pt;"><strong>دوو</strong> – پشكدارێن كۆمبوونێ ئاماژه ب هندێ كر، ڤهگهریان بۆ دهنگدانێ ب رێكا ههلبژارتنێن پێشوهخت نابیته روودانهكا نهقانوونى، ژبهركو دمێژوویێ دا وهسا دیار دبیت دهمێ قهیرانێن سیاسى روو ددهن، دیمۆكراسییهت ئهنجامان بدهست دئێخیت و هێزێن سیاسى یێن نیشتیمانى دهستوور و ههلبژارتنان بۆ دهربازكرنا قهیرانان بكاردئینن.</span></h3> <h3 style="text-align: justify;"><span style="font-size: 18pt;"><strong>سێ</strong> – پشكدارێن كۆمبوونێ داخواز ژ لایهنێن رهوتا سهدر كر، پشكدارییێ د دانوستاندنێن نیشتیمانى دا بكهن، داكو ئالیهتا چارهسهرییا ههموو بابهتان بدانن، ب جۆرهكى د خزمهتا هیڤی و داخوازییێن گهلێ عیراقێ و گههشتن ب ئهنجامێن باش بیت.</span></h3> <h3 style="text-align: justify;"><span style="font-size: 18pt;"><strong>چار</strong> - پشكدارێن كۆمبونێ ل سهر بهردهوامبوونا دیالۆگا نیشتیمانى ب مهرهما دارێشتنا نهخشه رێكهكا قانوونى و دهستوورى بۆ چارهسهركرنا قهیرانێن نوكه رێككهڤتن.</span></h3> <h3 style="text-align: justify;"><span style="font-size: 18pt;"><strong>پێنج</strong> - پشكداران داخواز كر، ههموو گرژییێن مهیدانى، میدیایى و سیاسى بهێنه راگرتن و دووپاتى ل پاراستنا دامهزراوهیێن دهولهتێ و ڤهگهریان بۆ دانوستاندنێن ئارام و دوور ژ تێكدان و ئێك و دوو شكاندنێ كر، داكو چ دژایهتى روونهدهن، ههروهسا داخواز ژ كهنالێن راگههاندنێ هاته كرن، پشتهڤانییا دانوستاندنێن نیشتیمانى بۆ خزمهتكرنا بهرژهوهندییا گهلێ عیراقێ بكهن.</span></h3> <h3 style="text-align: justify;"></h3>
