قایمقامێ قەزا خانەقین ڕاگەهاند، ل ڤان نێزیكان كۆمپانییەكا چینی دێ ل دەڤەرا نەفتخانە یا قەزا خانەقین دەست ب ڤەدیتن و بەرهەمئینانا پەتڕۆلێ كەت و گرێبەستا كاری ژی بۆ دەمێ زێدەتری 30 سالایە.
دلێر سایەخان، قایمقامێ قەزا خانەقین ئاشكەرا ژی كر، بڕیارە ل ڕۆژێن بهێت كۆمپانییا جیۆ جەید (Geo-Jade)یا چینی دەست ب لێگەڕیان و ڤەدیتن و پێشڤەبرن، پاشان بەرهەمئینانێ ل زەڤییا نەفتخانە یا قەزا خانەقین ل پارێزگەها دیالە بكەت.
دیار ژی كر، گرێبەستا وێ كۆمپانییێ دێ بۆ دەمێ 30 هەتا 34 سالان بیت و ئەڤ پڕۆژە پڕۆژەیەکێ پێدڤی و گرنگە بۆ دەڤەرێ و دۆپاتی ل وێ یەكێ هاتییەكرن ڕێژەیا زۆر یا دەستێ كاری د وی پڕۆژەی دا ئاكنجییێن قەزا خانەقین و دەڤەرێ بن و ئەڤ یەكە دێ كارتێكرنێ ل سەر ژێرخان و گەشەپێدانا قەزا خانەقین و دەوروبەرێن وێ ژی هەبیت.
