خانی نیوز، زنار تۆڤی:
ئاسنگهرهكێ دهۆكێ ئاشكرا كر، ئهڤ ساله بازارێ فرۆتنا سۆپێن داران یێ گهرمه و رۆژانه هژمارهكا سۆپان دفرۆشیت.
مێردین محهمهد بۆ خانی نیوز ئاشكرا كر، ئهڤه چهندین ساله ئهو كارێ ئاسنگهریێ ل باژێرێ دهۆكێ دكهت و ژ بابێ خوه فێری ڤی كاری بوویه و چهندین گهنج ژی ل گهل وی كارێ چێكرنا سۆپێن داران دكهن، ئهڤ ساله كارێ وان ژ سالا بوری باشتره، رۆژانه ئهو دناڤبهرا ههشت تا دههـ سۆپێن داران چێدكهن، ئهو سێ رهنگێن سۆپان چێدكهن و بهایێ وان ژی دناڤبهرا سیهـ تا پێنجی و پێنج هزار دیناران دایه، ئهو سۆپان ل دویڤ داخوازیا خهلكێ چێدكهن و ئاشكرا كر، پلێتا هندهكان یێ تهنكه و یێن هندهكان ژی یێ ستووره و ل دویڤ داخوازیا بكڕان سۆپه دهێنه دروست كرن.
ناڤهاتی زێدهتر گۆت: پلێت بۆ وان ژ وهلاتێ ئیرانێ دهێت، ههر چهنده هێشتا وهرزێ زڤستانێ دهست پێنهكریه، لێ ههر خهلك سۆپان دكرن، د نوكه دا خهلكێ گوندان پتر سۆپان دكرن، ههروهسا وان لبهره كارێ خوه بهرفرههتر لێ بكهن، ژ پێخهمهت پتر خهلك ل نك وان كار بكهت، ههر چهنده نوكه گهلهك ژ خهلكێ بهرێ خوه دایه ڤی كاری، لێ ههر كارێ وان یێ باشه و نوكه ئهو ل گهل ههر چار برایێن خوه و هندهك ژ كهسێن نێزیكی خوه كارێ ئاسنگهریێ دكهن، د ڤی وهرزی ژی دا كارێ وان یێ سهرهكی چێكرنا سۆپێن دارانه، ههر چهنده كارێ چێكرنا سۆپان و چێكرنا بوریێن وان یێ ب مژوولاهیه و گهلهك دهم پێڤه دچیت، لێ ئهو یێن فێربووین و خۆشیهكێ ژی ژ كارێ خوه دبینن.
بازارێ فرۆتنا سۆپێن داران گهرمه بوویه
