خانی نیوز، سالار محهمهد دۆسكی:
ئهندامهكێ مهكتهبا سیاسی یا بهرهی توركمانی ئاشكراكر، ئهو د گهل تێكدان و هێرشكرن و سۆتنا ئاڤاهیێن حكومی و حزبی نینن، ئهڤا دهێتهكرن ژى نهخوهنیشادانه بهلكو تێكدانا تهناهی و ئارامییا ههرێما كوردستانێ یه.
ئایدن مهعرووف، ئهندامێ مهكتهبا سیاسی یا بهرهی توركمانی كو ههڤدهم بهرپرسێ ئێكێ یێ وێ حزبێ یه ل ههرێمێ، بۆ خانی نیوز گۆت: ئهو د گهل خوهنیشادانێن خهلكی نه، لێ ب شێوهكێ ئارام و دوور ژ توندوتیژیێ بهێنهكرن، بهلێ خوهنیشادانێن نها زێدهتر توندوتیژی پێڤه دیاره و سۆتنا بارهگایێن حزبی و حكومی دهرڤهی قانوونێ نه و ئهڤه ناهێته قهبوولكرن.
ئایدن مهعرووف ئاشكرا كر، ئهڤ خوهنیشادانه زێدهتر بۆ مهرهمێن سیاسی دهێنهكرن و ئهڤه بۆ مووچهی نینه و زێدهتر بابهتهكێ سیاسی یه و ئارمانج ئهوه رهوشا سیاسییا ههرێما كوردستانێ بهێته تێكدان و تهناهی و ئارامی ل كوردستانێ نهمینت.
ئهندامێ مهكتهبا سیاسی یا بهرهی توركمانی گۆت ژى: هندهك كهس ل ههرێمێ ههنه دهرڤهی قانوونێ نه و بمخابنی ڤه دهستێن دهرهكی ژی هاتینه ناڤ خوهنیشادانان و ئهڤه د بهرژوهندا خهلكێ كوردستانێ دا نینه، گرنگه لایهنێن سیاسی یێن پشكدار د حكومهتێ دا و دهرڤهی حكومهتێ ژی ئێكرێزیێ ب پارێزن ههتا ئهڤ رهوشه دهرباز دبیت.
ئایدن مهعروفی، زێدهتر گۆت: ههموو گاڤا وهك بهرهیێ توركمانی داخوازا وان ئهوه ههمی ئالیێن سیاسی ل كوردستانێ ئێكرێز و ئێك دهنگ بن بۆ ڤێ قۆناغێ ژى ئێكرێزی ژ ههر تشتهكى گرنكتره.
