وهزارهتا دهرڤه یا ئهمریكا پێنج كۆمپانیێن پترۆكیمیایى یێن هاریكارییا ئیرانێ كری سزادان.
مایك پۆمپیۆ، وهزیرێ دهرڤه یێ ئهمریكا د بهیانهكێ دا راگههاند، ئهو دێ سزایى ب سهر كۆمپانییا ڤهگوهاستنا غاز و پترۆكیمیایى یا ڤیتنامێ دا سهپینن ژبهركو بازار د گهل ئیرانێ دا كرییه بۆ فرۆتنا بهرههمێن خوه، ئهو سزا ڤۆ فۆنگ، سهرۆكێ وێ كۆمپانیێ ژى ب خۆهڤه دگریت.
وهزارهتا گهنجینا ئهمریكا ژى سزا ب سهر چار كۆمپانیێن دى دا سهپاندییه كو بهرههمێن كیمیایى یێن كۆمپانییا تریلیانس پترۆكیمیكال ڤهگوهاستینه و كۆمپانیێن چینى و ئیماراتى ژى دناڤ وان دا ههنه.
دهستپێكا ئهڤساله، كۆمپانییا تریلیانس پترۆكیمیكال ژى سزایێن گران ژلایێ ئهمریكا ڤه ب سهردا هاتنه سهپاندن.
ژ ئهگهرێ سزایێن دژوار یێن ئهمریكا، بودجا خهملاندى یا سهربازى یا ئیرانێ بۆ سالا بهێت ب رێژا 24% كێم بوویه، ئهمریكا دبێژیت ئهوان سزایان شیانێن رژێما ئیرانێ بۆ پێشێلكرنا مافێن مرۆڤى و هێرشكرنا سهر خهلكى لاواز كرینه، ئاشكرا ژى كرییه كو ئیران ب تنێ ب گوهورینا رهفتارێن خۆه دشێت وان سزایان ل سهر خوه نههێلیت.
