ئه‌ندامه‌كێ جڤاتا نوونه‌رێن عیراقێ ئاشكراكر، سه‌رۆكێ جڤاتا نوونه‌ران ب ئاشكرایی دیاركریه كو چ پرۆژه‌قانوونا وه‌ك سه‌رۆكاتیا په‌رله‌مانی وه‌رناگرن هه‌كه رێكه‌فتنا ئالیێن سیاسی پێشوه‌خت ل سه‌ر نه‌هێته‌كرن.
جه‌مال كۆچه‌ر، ئه‌ندامێ جڤاتا نوونه‌رێن عیراقێ ژ فراكسیوونا ئێكگرتوویا ئیسلامى بۆ خانی نیۆز گۆت: محه‌مه‌د حه‌لبووسى، سه‌رۆكێ جڤاتا نوونه‌رێن عیراقێ د كۆمبوونا بووری یا ل گه‌ل هه‌رسێ سه‌رۆكاتیێن عیراقێ و ئالیێن سیاسی داخواز كریه كو چ پرۆژه‌قانوونان پێشكێشی نه‌كه‌ن، هه‌تا ئالیێن سیاسی ل سه‌ر ئێك نه‌گرن و سۆزێ بده‌ن دێ ئه‌و پرۆژه ل په‌رله‌مانی هێته ده‌ربازكرن، وی ده‌می دێ پرۆژه‌قانوون هێته وه‌رگرتن، حه‌لبووسی گۆتیه ژی: نه‌یێ به‌رهه‌ڤه پرۆژه‌كی وه‌ربگریت و ئالیه‌كێ سیاسی پشتگوهـ بهێته هاڤێتن و قه‌بوول ناكه‌ن ئه‌ڤه بهێته دووباره‌كرن ڤه.
ل دور خونیشاندانێن پارێزگه‌ها سلێمانیێ و هه‌له‌بجه ژی، جه‌مال كۆچه‌ر گۆت: شێوازێ ئه‌ڤان خونیشاندانان جوداهی هه‌بوو ژ خونیشاندانێن به‌رێ، عیراق هه‌می هاته هه‌ژاندن و هه‌موو وه‌لاتێ عیراقێ هاتیه هشیاركرن كو دڤێت چاره‌سه‌ریه‌ك بۆ مووچێن خه‌لكێ كوردستانێ بهێته دیتن و دو ئاراسته هه‌نه، ئێك ب زووترین ده‌م رێكه‌فتن د ناڤبه‌را هه‌ردو حكومه‌تێن به‌غدا و هه‌رێمێ دا بهێته‌كرن، ئاراستا دووێ ئه‌وه هنده‌ك ب چاڤه‌كێ ره‌ق به‌رێخودده‌نه هه‌رێما كوردستانێ و حه‌ز دكه‌ن بكه‌ڤیته د ره‌وشه‌كا نه‌خۆش دا و ئه‌و دبێژن فشار و پشتگوههاڤێتنا وان بۆ هه‌رێمێ به‌رهه‌مێ خوه گرت، دڤێت هه‌رێما كوردستانێ ئه‌ڤێ چه‌ندێ ل به‌رچاڤ وه‌ربگریت و چ رێك نینن دڤێت ل گه‌ل به‌غدا ب رێكبه‌ڤن، یا دویێ ده‌مێ پرۆپاكندا هه‌لبژارتنا نینه و نابیت چ ئالیێن سیاسی نه ده‌ستهه‌لات و نه ئۆپۆزسیۆن پرۆپاكندێ بكه‌ن.
هه‌مان ئه‌ندامێ په‌رله‌مانی گۆت ژی: هه‌كه هه‌ر 58 كورسیكێن كوردان ئه‌وێن ل به‌غدا بتنێ پارتی بیت یان ئێكه‌تی یان بتنێ ئۆپۆزسیۆن بیت، كه‌مینه‌كه ژ ئێك ل سه‌ر چارێ یا كورسیكێن په‌رله‌مانی و نه‌شێت چ بكه‌ت، هه‌كه ناڤخوه‌یا خوه راست ڤه نه‌كه‌ن نه‌شێن چ بكه‌ن و هه‌ر چ بیت كی پتر بینیت چ ژ سه‌نگا كوردان ل به‌غدا ناهێته گوهۆرین و دڤێت هه‌موو ئالیێن سیاسی بگه‌هنه ڤێ باوه‌ریێ.
جه‌مال كۆچه‌ر ئاشكرا كر، بژارده‌كا دی هاتیه پێش بۆ مووچێن فه‌رمانبه‌رێن هه‌رێما كوردستانێ، پێشبینی دهێته‌كرن هه‌ردو حكومه‌تێن به‌غدا و هه‌ولێرێ ل سه‌ر وێ بژاردێ ئێك ده‌نگ بن، پشتی په‌سه‌ندكرنا بودجا 2021 یا عیراقێ بژارده‌كا نوو دێ هێته پێش و دێ بۆ ئالیێن سیاسی و هه‌ر دو حكومه‌تێن به‌غدا و هه‌رێمێ شرۆڤه‌كه‌ن، ئه‌ڤه هه‌كه نه گه‌هشتنه چ رێكه‌فتنان و بژاردا دویێ ژی حكومه‌تا هه‌رێما كوردستانێ قه‌بوول نه‌كر راسته‌وخۆ مووچه ژ به‌غدا بهێن، براژدا سیێ ژى ئه‌وه مووچێن هه‌رێما كوردستانێ به‌غدا بده‌ت به‌لێ ل هه‌رێما كوردستانێ ئانكو ل بانكێن به‌غدا ل پارێزگه‌هێن هه‌رێما كوردستانێ وه‌ربگریت و ئه‌ڤه ژی دێ ل بن كونترۆلا حكومه‌تا هه‌رێما كوردستانێ بیت، ب تنێ دێ چیته سه‌ر هه‌ژمارا هه‌ر تاكه كه‌سه‌كی و ئه‌ڤ بژارده هه‌ر دبه‌رژوه‌ندا فه‌رمانبه‌ران دایه بۆ هه‌ردو حكومه‌تان ژی باشتره.
جه‌مال كۆچه‌ری گۆت ژی: هه‌موو بزاڤێن ئه‌ندامێن په‌رله‌مانی ئه‌وه هه‌ر دو حكومه‌تێن هه‌رێما كوردستانێ و به‌غدا بگه‌هنه رێكه‌فتنێ و هه‌كه نه‌گه‌هشتنه رێكه‌فتنێ دڤێت بژارده‌كا دی هه‌بیت و ئه‌و ژی دێ ئه‌ڤه بیت یا مه ل سه‌ر دیاركری.
سالار محه‌مه‌د دۆسكی
