سه‌رۆكوه‌زیرێن ئسرائیلێ و پاشایێ مه‌غربێ ده‌ستپێكرنا په‌یوه‌ندیێن سیاسى و بازرگانى یێن هه‌ردو وه‌لاتان گۆتوبێژكرن.
رۆژناما یه‌دیغوت ئه‌حره‌نۆت یا ئسرائیلى به‌لاڤكرییه، بنیامێن نه‌ته‌نیاهۆ، سه‌رۆكوه‌زیرێن ئسرائیلێ و محه‌مه‌دێ شه‌شێ، پاشایێ مه‌غربێ د په‌یوه‌ندییه‌كا تێ‌له‌فۆنى دا ئاساییكرنا په‌یوه‌ندیێن هه‌ردو ئالییان و ده‌ستپێكرنا په‌یوه‌ندیێن سیاسى، بازرگانى و گه‌شتیارى گۆتوبێژكرن، نه‌ته‌نیاهۆ ل به‌رامبه‌ر پێشوازیكرنا شاندێ وه‌لاتێ وى سوپاسییا پاشایێ مه‌غربێ كر.
د چه‌ند رۆژێن بوورى دا، شانده‌كێ بلند یێ ئسرائیلێ ب سه‌رۆكاتییا مائیر شابات، شیره‌تكارێ ئاساییشا نه‌ته‌وه‌یى یا ئسرائیلێ سه‌ره‌دانا وه‌لاتێ مه‌غربێ كر و دگه‌ل محه‌مه‌دێ شه‌شێ، پاشایێ وى وه‌لاتى رێكه‌فتنا ئاشتیێ ئیمزاكر.
تا نها وه‌لاتێن ئیمارات، به‌حره‌ین، سوودان و مه‌غرب رێكه‌فتنا ئاساییكرنا په‌یوه‌ندیێن خۆه دگه‌ل ئسرائیلێ ئیمزاكرینه، رێكه‌فتن ب سه‌رپه‌رشتییا ویلایه‌تێن ئێكگرتى یێن ئه‌مریكا هاتینه ئیمزاكرن بۆ كێمكرنا ئالۆزیێن ده‌ڤه‌رێ و پاراستنا ئاساییشا ئسرائیلێ.
