سوپایێ ئسرائیلێ ب مۆشه‌كان هێرش كره سه‌ر چه‌ند بنگه‌هێن ته‌ڤگه‌را حه‌ماس ل كه‌رتێ غه‌ززه.
سوپایێ ئسرائیلێ د تویته‌كى دا راگه‌هاند، هێزێن وان ئه‌ڤرۆ رۆژا شه‌مبى هێرشى بنگه‌هێن ته‌ڤگه‌را به‌رخۆدانا ئیسلامى حه‌ماسێ ل كه‌رتێ غه‌ززه كر، پشتى وێ ته‌ڤگه‌رێ ئێڤارا ئه‌ینیێ چه‌ند مۆشه‌ك ئاراسته‌ى ئسرائیلێ كرین.
دیار ژى كر، بنگه‌هێن دروستكرنا مۆشه‌ك و ژێرخانا ژێر ئه‌ردى و خاله‌كا سه‌ربازى یا ته‌ڤگه‌را حه‌ماس ل غه‌ززه كرینه ئارمانج، ئه‌و هێرش ژى به‌رسڤه‌ك بوو بۆ ئاراسته‌كرنا چه‌ندین مۆشه‌كان كو ژ غه‌ززه به‌ر ب باشوورێ ئسرائیل هاتبوون هاڤێتن.
مۆشه‌كێن حه‌ماس، ئێڤاری یا رۆژا ئه‌ینى ب ئاراستا ئاخا ئسرائیلێ هاتنه هاڤێتن و تا نها زیانێن وان نه‌هاتینه ئاشكه‌راكرن.
د هه‌مان ده‌م دا، ئاژانسا وه‌فا یا نووچه‌یێن فه‌له‌ستینێ ئاماژه ب وێ یه‌كێ كرییه، فرۆكێن شه‌ركه‌رێن ئسرائیلێ ل سپێده‌هییا رۆژا شه‌مبى ب پێنج مۆشه‌كان زنجیره‌كا هێرشێن ئه‌سمانى كرییه سه‌ر رۆژهه‌لاتێ باژێرێ عه‌ززه و زیانێن ماددى یێن مه‌زن ب وێ ده‌ڤه‌رێ گه‌هشتینه.
