سەرۆکوەزیرێن ئیراقێ راگەھاند؛ کار ژ بۆ ڤەگەراندنا ئێمناھییا گەل و سوپایێ ئیراقێ دکەت و گەف ل عەسائیب ئەھلولحەق کرن و دیارکر ئەو ئامادەیە بەرھەنگارییا وان بکەت.
مستەفا کازمی، د تویتەکێ دا راگەھاند؛ ئاساییشا ئیراقێ ئەمانەتە د ستۆیێ وان دا و سەرکێشییا گاڤێن تاک ئالی ناکەت، بەلکو کار ژ بۆ ڤەگەریانا باوەرییا گەل، ھێزێن ئێمناھی و سوپایێ ئیراقێ دکەت، ھەروەھا گەف ل ھێزێن عەسائیب ئەھلولحەق کرن و دیار کر، گەر پێدڤی کر دێ بەرھەنگارییا وان کەت ژ بۆ دوورخستنا ئیراقێ ژ ئالۆزییان.
گەفێن کازمی د دەمەکی دانە کو میلیشیایێن عەسائیب ئەھلولحەق، ٤٨ دەمژمێر وەک مۆلەت داینە تاکو چەکدارێن وان ئازادبکەت كو ب فەرمانا کازمی ھاتینە دەستەسەرکرن و دەست د ھێرشا سەر بالیۆزخانەیا ئهمریكا ل بەغدا دا ھەبوون.
عەسائیب ئەھلولحەق، ئێکە ژ میلیشیایێن حەشدا شەعبی و ئەمریکا د بێژیتن ب فەرمان و پشتەڤانییا ئیرانێ کار دکەت و بەرژەوەندیێن ئەمریکا ل ئیراقێ دکەتە ئارمانج.
