سەرۆکێ فراکسیۆنا پارتییا دیمۆکراتا کوردستانێ ل جڤاتا پارێزگەھا نەینەوا ئاشکراکر کو پارێزگا‌رێ نەینەوا ب دلێ خوە کەفتیە و پۆستان لێکڤەدکەت و سێ پۆستێن رێڤەبەرێن گشتی و چەند رێڤەبەرێن دی پشکا کوردانە و ھەتا نھا پێ نەھاتینە دان.
بەرەکات شەمۆ، سەرۆکێ فراکسیۆنا پارتییا دیمۆکراتا کورستانێ ل جڤاتا پارێزگەھا نەینەوا بۆ خانی نیوز گۆت: ل گۆرەی رێژا دەنگێن فراکسیۆنا برایەتی و پێکڤەژیانێ ل پارێزگەھا نەینەوا ھێشتا ھندەک پۆست ب کوردان نەھاتینە دان، تایبەت پۆستێن رێڤەبەرێن گشتی کو بەر کوردان کەفتبوون ھەتا نھا ئەو پۆست ب فراکسیۆنا برایەتی و پێکڤە ژیانێ نەھاتینە دان.
بەرەکاتی گۆت ژی: پێدڤی بوو پۆستێن رێڤەبەرێن گشتیێن (پەروەردێ، وەبەرھێنانێ، ساخلەمیێ) و رێڤەبەرێن (چاندنێ، ئاڤێ) و چەند پۆستێن ئەمنی وەک رێڤەبەرێ پۆلیسان ب فراکسیۆنا برایەتی و پێکڤەژیانێ ھاتبانەدان، ھەتا نھا عەرەب ئەڤان پۆستان برێڤەدبن و رادەستی کوردان نەھاتینەکرن.
سەرۆکێ فراکسیۆنا پارتی ئەو ژی گۆت: پشتی جڤاتێن پارێزگەھا ھاتینە ھەلوەشاندن ئێدی پارێزگار و ھندەک وەزیر ب کەیفا خوە کەفتینە و ب دلێ خوە ئەڤان پۆستان دەنە خەلکەکی.
ناڤبری گۆت ژی: نوکە گەلەک دەستھەلات بۆ پارێزگا‌ری ھاتینەدان و پێشتر ھەر رێڤەبەرەکێ ھاتبا دانان ل جڤاتێ ب دەنگدان دھاتە دانان لێ نوکە ئەو یەک نەمایە، پشتی ٢٠١٤ رێژا کوردان گەلەک کێم بوویە و تایبەت پشتی ١٦ی ئۆکتوبەرێ کوردان کونترۆل ل سەر دەڤەرێن مادێ ١٤٠ نە ئیداری و نە ئێمناھی نەمایە.
