ب تنێ خێزانەکا مەسیحی د ناڤ سەنتەرێ ناحیا شێلادزێ دا دژیت، ب دەھان ھزار خێزانێن بوسرمان ژی د ناڤ وی باژاری دا ھەنە و ب مەرەما پیرۆزباھیا جەژنا حەزرەتا مەسیح سەرەدانا وێ خێزانا مەسیحی کرن.
خوشابە قەشو ھورمز، خەلکێ گوندێ ھیشێ یێ سەر ب عەشیرەتا رێکان ڤە یە ل سنۆرێ ناحیا شێلادزێ بۆ خانی نیوز دیار کر، حوکمەتا بەعسا ژناڤچوویا عیراقێ ل سالا ١٩٧٦ ئەو ب نەچاری ژ سەر گوندێن وان راکرن و برنە دەشتا نەینەوا و ل تلکێفێ ئاکنجیکرین، پاشان د گەل ھندەک گوندیێن دی مالێن خوە ڤەگوھاستە شێلادزێ و نەشیان ل دەشتێ ژیانا خوە ببنە سەری، ژبەرکو ئەو فێری سروشتێ وێ دەڤەرێ نەببوون، ھەروەسا ئەو نەشیا دەست ژ سروشت و بوسرمانێن دەڤەرێ بەردەت، لەوما ئەڤە سەرێ چەندین سالانە ئەو دناڤ بوسرمانێن ڤێ دەڤەرێ دا دژین و ھەتا نوکە خەلکێ ڤێ دەڤەرێ چو نەخۆشی نەگەھاندینە وان.
خوشابە قەشو ھورمز خویا کر، ھەمی جەژن و خۆشی و نەخۆشیان ئەو ل گەل بوسرمانان پشکدار دبن و ھەروەسا بوسرمانێن دەڤەرێ ژی دگەل وان پشکدارن و چ جوداھیێ د ناڤبەرا خوە و بوسرمانان دا نابینین.
ژ لایێ خوەڤە ئەحمەد جەھوەر شێخو رێکانی، یێ ب مەرەما پیرۆزکرنا جەژنێ سەرەدانا ڤێ مالا مەسیحی کری بۆ خانی نیوز گۆت: یا دیارە ل دەڤەرا وان ئەڤ پێکڤەژیانە ھەر ژ کەڤن دا یا ھەبوویە و ئەو مەسیحیێن د ناڤ مە دا چ جاران ھەست ب ھندێ نەکریە کو جوداھیەکا د ناڤبەرا وان دا ھەی، بەلکو ھەمی دەمان مە پێکڤە رێورەسمێن خوە یێن گێراین، چ یێن ئایینی بن یان ھەر بیرەوەری و ھەلکەفتەک بیت.
