پشتی رێکەفتنا د ناڤبەرا ھەرێم و بەغدا دا بریارە ھەرێما کوردستانێ بۆ جارا ئێکێ پشتی قەیرانا دارایی پرۆژە قانوونا بودجەی بەرھەڤ بکەت و سەرۆکێ لیژنا دارایی ژی ل پەرلەمانێ کوردستانێ دبێژیت: ھەکە بودجە بھێتە پەسەندکرن بڕینا مووچەی نامینیت.
زیاد جەبار، سەرۆکێ لیژنا دارایی ل پەرلەمانێ کوردستانێ بۆ خانی نیوز دیارکر، حکومەتا ھەرێما کوردستانێ بڕیار دایە پرۆژەقانوونا بودجێ ھەرێما کوردستانێ بۆ سالا بھێت ٢٠٢١ێ بەرھەڤ بکەت، ئەڤە ژی پشتی رێکەفتن دگەل بەغدا ھاتیەکرن، لەورا نوکە کار یێ بۆ بەرھەڤکرنا پرۆژەقانوونا بودجێ سالا بھێت دھێتەکرن.
سەرۆکێ لیژنا دارایی و ئابووری گۆت ژی: پشتی قەیرانا دارایی و شەرێ داعشێ ھەرێما کوردستانێ چ قانوونێن بودجەی نەبووینە، ژبەرکو بەھانەیا حکومەتێ ژی نەبوونا پارێ پێدڤی بوو، ھندەک جاران پارە ژلایێ بەغدا دھاتە ھنارتن و ھندەک جاران دھاتە بڕین، ئەڤەژی بۆ ئەگەرێ نەبوونا قانوونا بودجەی ل ھەرێما کوردستانێ.
زیاد جەبار ئاشکرا ژی کر، ھەکە قانوونا بودجەی ل پەرلەمانی بھێتە پەسەندکرن، ئەڤە بێگۆمان دێ مفایەکێ مەزن ھەبیت، ژبەرکو ئاریشا بڕین و پاشکەفتنا مووچێ فەرمانبەران نامینیت و ل گۆرەی قانوونا بودجەی دێ ھەموو ھەیڤەکێ مووچە د دەمێ خوەدا ھێنە بەلاڤکرن، ھەروەسا دێ پارە بۆ پڕۆژان ژی دیار دبیت، بەری نوکە ژبەر نەبوونا قانوونا بودجەی بێسەروبەری د مەزاختنا پارەی دا ھەبوو.
ھەولێر، قائید میرۆ
