سترانبێژی کۆچک و دیوانان ھشیار سندۆری دیارکر، د بەرنامێ وی دایە ل دەمەکێ نێزیک دوسێ کلیپان و ل گەل بەرھەمەکێ دەواتان چێکەت ب سترانێن فولکلوری یێن دەواتان و ھندەک ژ سترانێن سترانبێژ ئیسڤێ عەبۆ خۆرتا ئەوێن نە تۆمارکری جارەکا دی تۆماربکەت ب تەکنیکەک و کوالتیەکا نوو.
ھشیار سندۆری دیدارەکێ دا بۆ خانی نیوز گۆت: گەلەک حەز ژ کارێ ئەکتەریێ دکەت، تشتێ ژ سترانگۆتنێ زەحمەتتر ئەکتەریە و گەلەک حەز ژ وی کاری ژی دکەت، ھەکە داخواز ژ من بھێتە کرن پشکداری فلمەکی بیت یێ بەرھەڤە، بەلێ ب مەرجەکی ئەو رۆلێ دەنە وی ل گەل ستایل و کەسایەتیا وی بگونجیت و کارتێکرنێ لێ نەکەت، باوەری ژی ب شیانێن خوە ھەیە کو دێ رۆلەکێ باش گێریت، ژبەرکو حەزا وی یا ل سەر وی کاری.
ھشیار سندۆری گۆت: ھەر سترانبێژەکێ ناڤدار دەمێ وەغەر دکەت ئێک ژ مالباتا وی رادبیت و سترانا بێژیت، بەلێ کا دێ چەند شێت خوە نێزیکی دەنگ و ستایل و ساخلەتێن وی ھونەرمەندی کەت و کا دێ چەند سەر کەفتنێ ئینت، گەلەک گرنگە ھەر ھونەرمەندەکێ د بیاڤەکی دا کاربکەت و دەمێ وەغەر دکەت ئێک ژمالباتا وی جھێ وی بگریت و وی کاری بکەت، لەورا وی ژی ب فەر دیت سترانێن مامێ خوە ئیسڤێ عەبو خۆرتا بێژیت و ھەرکەسەکێ گوھـ ل وان سترانا بیت یێن ئەو دبێژیت دێ ئێکسەر بێریا مامێ وی ئیسڤێ عەبۆ خۆرتا کەت و وەسا ناڤێ وی دێ ھەرمینت، راستە سترانێن مامێ وی فولکلورن و دەستکاری یا د سترانێ دا کری ب رەنگەکێ جوان و ھەرکەسەکێ بێژیت و تشتەکێ جوان پێشکێش کەت دروستە، بەلێ دەستکاریێ تێدا نەکەت و وەکو خوە بێژیت.
ھشیار سندۆری گۆت ژی: گەلەک حەز دکەن پارکەک، یان جھەک ب ناڤێ ئیسڤێ عەبۆ خۆرتا بھێتە ناڤکرن و بیتە جھەکێ کەلەپوری و ڤێ پارکێ ژی دێ ھەموو سترانبێژێن کۆچک و دیوانان لێ خرڤەبن و دێ بیتە کەلەپوری.
ھشیاری شەش زارۆ ھەنە ژ وانا سێ کچ و سێ کورن، ناڤێن وان ژی (یوسف، لاوک و میر، لورین، لوڤین و رۆژان)، گەلەک حەز ژ خوارنێن کوردەواری دکەت وەک ئاڤشرینک و ترشکێ و ئیپراخا و ساڤاری، بەلێ حەز ژ خوارنا سەروپێکان و کوتل دەوێ ناکەت، مۆلەتا ھاژۆتنا ترومبێلێ ژی ھەیە، لێ حەزدکەت ب پیان ھاتنوچوونێ بکەت ل بە رنینە ژنا دویێ بینیت، ژبەرکو ل گەل ھەڤژینا خوە و زارۆێن خوە یێ بەختەوەرە.
خانی نیوز، ھەرھین محەمەد:
