رێڤەبەرێ پەیوەندیێن دەرڤە ل زانکۆیا زاخۆ ئاشکرا کر، خواندنا ئۆنلاین جھێ خواندنا پۆلان ناگریت، ژبەرکو سیستەمێ ئۆنلاین ل رۆژھەلاتا ناڤین ب گشتی ناھێتە پەیرەوکرن لەوما ئاریشە دێ ھەرھەبن.
د. سابر حاجی، رێڤەبەرێ پەیوەندیێن دەرڤە ل زانکۆیا زاخۆ بۆ خانی نیوز گۆت: ل ھەموو وەلاتێن جیھانێ مامەلێن خەلکی ب ئۆنلاین دھێنە برێڤەبرن و ل کوردستانێ ژی یا بەر ب وێ چەندێ ڤە دچیت لێ گەلەک یا سستە، ھەکە بەرێ بنیاتێ حکومەتێ ب شێوازەکێ ئۆنلاین نەبیت دێ کارتێکرن ل خواندنێ و زانکۆیا ژی ھەبیت و ھەکە ئەڤە ھەبا ل کوردستانێ دا نوکە رەوشا خەلکی باشتر بیت وەک ئۆنلاین.
د. سابر حاجی گۆت: ھەکە سیستەمێ بانکی ئۆنلاین ھەبا دا نوکە سیستەمێ خواندنێ ژی وەک ئۆنلاین بۆ خەلکی گەلەکێ ب ساناھی بیت و دا خەلکی ھزرەک ھەبیت و دا زێدەتر ل گەل گونجن، ل وەلاتێن رۆژئاڤا ھزر ل سەر خواندنا ئۆنلاین ھەنە ژبەرکو ھەموویان حکومەتێن ئۆنلاین ھەنە و ھەمی کارێ وان پێ برێڤە دچن.
د.سابر حاجی زێدەتر گۆت: پشتی نەمانا کۆرۆنایێ و دەرگەھێن قوتابخانا بھێنە ڤەکرن دێ ھەر وەک پێشتر خواندن ڤەگەریت، ژبەرکو گەلەک ئاریشێن خواندنا ئۆنلاین ھەنە و تایبەت ئاریشێن ئابووری و نەبوونا پێدڤیێن خێزانێ وەک ئەنترنێتێ و ئایپات و قوتابیان شیانێن زمانی و شارەزایا کومپۆتەری نینن، گەلەک خەلک ل گوندانە و ئەڤێ ژی کارتێکرن ل سەر ھەیە و بزەحمەتە خەلکەک ل سەر وی سیستەمی بچیت و ئەو یەک دێ کارتێکرنێ ل ئاستێ قوتابیان کەت.
