رێڤەبەرێ پرۆژە و چاڤدێریێ ل سەر پەرلەمانێ کوردستانێ، ئاشکراکر، خراپترین خولا پەرلەمانێ کوردستانێ ئەڤ خولەیە، ئەندامێ پەرلەمانی ھەیە ھەتا نوکە ئێک پەیڤ ژی نە ئاخفتیە و زێدەتر ئەندامێن پەرلەمانی ل دەمێ گەنگەشێن پرۆژەقانوونا بەرھەڤ نابن و دەردکەڤن.
بابان جەعفەر حەمە، رێڤەبەرێ پرۆژە و چاڤدێریێ ل سەر پەرلەمانێ کوردستانێ ل ئەنستتیوتا پەی بۆ پەروەردە و گەشەپێدانێ بۆ خانی نیوز گۆت: خولا چارێ یا پەرلەمانێ کوردستانێ خواندنا ئێکێ بۆ (٢١٦) پرۆژان ھاتبووکرن، (٣٢) قانوون ھاتبوونە پەسەندکرن، خولا پێنحێ ھەتا ١/٩/٢٠٢٠ (٧) قانوون و (٤) بریار ھاتینە دەرکرن و خواندنا ئێکێ بۆ (٣١) پرۆژان ھاتیەکرن.
ناڤبری گۆت: خولا چوار یا پەرلەمانی (٣٢) قانوون دەرکرینە و بتنێ (٤) چووینە دبیاڤێ بجھئینانێ دا، بریار بتنێ (٢) جێبەجێکرینە ونەجێبە جێکرن بەر ب زێدەبوونێ یە و خولا پێنجێ ژی ب ھەمان شێوەیە.
بابان جەعفەر حەمە گۆت ژی: باشترین چارەسەری بۆ ئەڤان کاودانان ئەوە دەستکاریا د ئمتیازاتان دا ھاتیەکرن بھێتە سەپاندن و بیتە ھەمیشەی، داکو دادپەروەری نێزیکی بیت و مەزاختیێ پەرلەمانی گەلەکێ زێدەیە و ڤێ خولێ کێمتر پارە ل بەر دەست ھەنە ژ خولێن بووری و ئەو ژی ژ بەر قەیرانا دارایی یە.
ناڤبری گۆت: ١/٣/٢٠٢٠ ھەتا ١/٩/٢٠٢٠ خولا بھارێ یا پەرلەمانی (١٨) ئەندامێن پەرلەمانی ژ فراکسیوونێن جودا ب ئێکجاری نە ئاخفت بوون، (١٧) پەرلەمانتار ئێک جار (٢٧) پەرلەمانتار دو جار (١٢) پەرلەمانتار سێ جار و ب ڤی رەنگی ھوسا دەربازبوویە.
ناڤبری گۆت: پرۆژەقانوون ھەنە ژ خولا سیێ وەرە ل پەرلەمانی نە و ھەتا نوکە نەبووینە قانوون و ناھێتە بجھئینان، ئەڤ خولە خراپترین خولە .
