ئەندامەکێ پەرلەمانێ کوردستانێ ژ فراکسیۆنا پارتییا دیمۆکراتا کوردستانێ راگەھاند، ژبەرکو لاھوور شێخ جەنگی یێ خۆفرۆش وەسا ھزر دکەت رێککەفتنا ھەولێر و بەغدا د بەرژەوەندا پارتی دایە، بزاڤا دروستکرنا ئاستەنگان ھمبەری وێ رێککەفتنێ دکەت ب رێیا تێکدانا رەوشا ناڤخوەیا ھەرێمێ.
مەم ئەسکەندەر نێروەیی، ئەندامێ پەرلەمانێ کوردستانێ ژ فراکسیۆنا پارتی نڤیسینەک ب ناڤونیشانێن (ھەکە نیڤ سەرۆک بیت و نەزان و خاکفرۆش بیت دێ چاڤەرێ چ ژێ کەی) بەلاڤکریە و ئاشکرا دکەت، د ھەموو کولان و جادەیێن زۆنا کەسک دا ل بەغدا لاھوور شیخ جەنگی و تاخمێ وی یێ خۆفرۆش رێیەک دیتیە بۆ دزینا پارێ خەلکی، ل دەریێن سنۆری ژی ب دەھان چۆرێن قاچاغیێ دکەن و کەلوپەلێن ئێکسپایەر دھێننە ناڤا کوردستانێ کو بووینە ژەھر و خەلک تووشی ب دەھان نەخۆشیان بووینە، ھەموو ژی ب تنێ بۆ پڕکرنا بەریکێن خوەیە، ئەو ب خوە ژی دزانن یێن بووینە ژێدەرێ نەخۆشی و دەردەسەرییان بۆ خەلکێ کوردستانێ.
مەم ئەسکەندەر ئاشکرا کر، ئەو تاخمێ خۆفرۆش ژبەرکو ئارمانجا وان بەریکا وان و رازیکرنا ئاغایێ وانە، د وێ خەمێ دا نینن کا خەلک تووشی چ دەردەسەرییان بیت، بەردەوام رێکێ ژی ل چاکسازیێن حکومەتا ھەرێما کوردستانێ دگرن، ژبەرکو دزانن ژ ئەنجامێ چاکسازیێ دزی و قاچاغییا وان نامینیت و دێ تووشی روورەشی و شەرمزاریێ بن.
مەم ئەسکەندەر، پەرلەمانتارێ پارتی ئاشکرا ژی کر، تاخمێ خۆفرۆش ھەموو بزاڤان دکەن رەوشا ژیانا خەلکی خراب بیت دا ل سەر دزی و تالانکرنێ بەردەوام بن، ئەو تاخم ژی نھا ھمبەری پارتی تووشی ھێستریایێ بووینە، ژبەرکو دزانن پارتی ھێزا ئێکانەیە شەری بۆ ئاخ و ناسناما نەتەوەیی و سەرخوەبوونا کوردستانێ دکەت، ئاغایێن وان خۆفرۆشان ژی وێ راستیێ دزانن، لەورا بەردەوام دژی پارتی لڤینان دکەن و ل بەغدا ژی ھەموو بزاڤان دکەن کو ھەردو حکومەتێن ھەولێرێ و بەغدا رێکنەکەڤن، ژبەرکو ب ھزرا نیڤ سەرۆکی ئەو رێککەفتن دێ بیتە ئەگەرێ باشترکرنا رەوشا ژیارا خەلکی و ب وێ یەکێ پارتی دێ قازانجێ کەت.
ل گۆرەی گۆتنا مەم ئەسکەندەر، پەرلەمانتارێ پارتی ئەو تاخمێ خۆفرۆش ل سەر دژایەتیکرن و کەرب ھلگرتنا ژ پارتی پەروەر بووینە، ھەکە وەسا ژی نەبایە وان کەرکووک نەدفرۆشت و نە دگۆتە نووری مالکی بودجە و مووچێن کوردستانێ ببڕن، ھەکە ئەو ل سەر خیانەتێ پەروەردە نەببان گوھدارییا سروودا مەوتنی نەدکر و خوە ب بەنی ئەسەد ھەژمار نەدکر.
ل داویێ مەم ئەسکەندەر گۆت، ھەر کەسێ ل شوونا لاھوور جەنگی و تاخمێ وی یێ خۆفرۆش با دا ژ شەرمزارییا وان ھەموو خیانەتان دا مریت، لێ ھەکە ئەو ژ روویێ شەرم و حەیایێ مفلس بن، گوننەھا خەلکی چیە بەردەوام باجا بێ شەرمی یا وان بدەت.
مەم ئەسکەندەر: گوننەھا خەلکی چیە بەردەوام باجا بێ شەرمی یا تاخمەکێ خۆفرۆش بدەن
