رێڤەبەرێ کاروبارێن پشکنینێ ل رێڤەبەریا گشتی یا گەشتوگوزارێ ئاشکراکر، بۆ سالا نووی چ بەرنامە و ئاھەنگ نابن بتنێ خوارنگەھـ و ئوتێل دێ پێشوازیا گەشتیاران کەن، ئەڤ شەڤە دێ ١٠ ھزار گەشتیارێن باشوور و ناڤەراستا ئیراقێ مێھاڤێن دھۆکێ بن.
شەمال جەعفەر ھرۆری، رێڤەبەرێ کاروبارێن پشکنینێ ل رێڤەبەریا گشتی یا گەشتوگوزارێ ل پارێزگەھا دھۆکێ، ئەڤرۆ ٣١/١٢/٢٠٢٠ بۆ خانی نیوز ئاشکراکر، رێژا گەشتیاران بەر ب کێمبوونێ یە ژبەرکو ل پتریا وەلاتان و تایبەت وەلاتێ تورکیا قەدەغەیا دەرکەفتنێ ھەیە ژ بەر پەژیکا کۆرۆنایێ، لەوما نڤێسینگەھێن گەشتوگوزارێ پرۆپاکندا گەشتیاران نەکریە کو خەلکی بۆ ئاھەنگێن سەرێ سالا نوو ببنە دەرڤە، ب تنێ ھەکە بۆ کارەکێ بازرگانی یان ساخلەمیێ خەلک بچیتە ڤی وەلاتی، کۆمپانی و نڤێسینگەھێن گەشتیاری بەرھەڤیا چوونا گەشتیاران نەکرینە کو بچنە دەرڤەی وەلاتی و بەرنامە نینن.
ناڤبری گۆت ژی: پێشبینی دکەین ھەتا (١٠) ھزار گەشتیاران بۆ ئەڤ شەڤە کو شەڤا سەرێ سالا نوویە، مێھڤانێن باژێرێ دھۆکێ بن و پتریا گەشتیارێ دھۆکێ یێ باشوور و ناڤەراستا ئیراقێ یە.
ھرۆری گۆت ژی: وەک حکومەت و رێڤەبەریا گەشتوگوزارێ چ ئاھەنگ و چالاکی ئەڤ شەڤە نینن و بتنێ خوارنگەھـ و ئوتێل دێ پێشوازیا گەشتیاران کەن و بێی ئاھەنگ و چالاکی.
خانی نیوز، سالار محەمەد دۆسکی:
