رێڤه‌به‌رییا گشتى یا كه‌ش و هه‌وایى و بیڤه‌له‌رزان ل هه‌رێما كوردستانێ چه‌ند زانیاریه‌ك سه‌باره‌ت ده‌نگۆیێ هشكه سالیێ ل هه‌رێما كوردستانێ دیاركر، ئه‌ڤرۆ سێشه‌مبى 5-1-2021ێ فازل ئیبراهیم، رێڤه‌به‌رێ گشتیێ كه‌ش و هه‌وایێ و بیڤه‌له‌رزان ل هه‌رێما كوردستانێ ده‌رباره‌ی ده‌نگۆیێ سه‌رهلدانا هشكه سالیێ ل هه‌رێما كوردستانێ راگه‌هاند، ل دووڤ وان ئامارێن هه‌ین ئه‌م دشێن بێژین كو وه‌رزێ بارانبارینا ئه‌ڤ ساله یا جودایه دگه‌ل سالێن بۆرى، ژبه‌ركو ژ ده‌ستپێكا وه‌رزى باران گیرۆبوویه.
ئه‌و چه‌نده ژى دیار كر كو هه‌تا راده‌یه‌كى باران ل ده‌ڤه‌رێن كوردستانێ بارییه، و پێشبینى ژى دهێته كرن كو ل نیڤا ڤێ هه‌یڤێ دووباره وه‌رزێ زڤستانێ خۆ نوو بكه‌ته ڤه و دوو هه‌تا سێ نزمییا فشارێ بهێته ده‌ڤه‌رێن مه و ئه‌ڤه ژى دێ بیته ئه‌گه‌رێ بارانبارین و به‌فربارینێ ل ده‌ڤه‌رێن چیایى و ده‌وروبه‌ران، ئه‌ڤه ژى دێ بیته پشته‌ڤانییه‌ك بۆ وێ رێژا كو به‌رى نوكه بارییه.
ئاماژه ب وێ چه‌ندێ ژى دا كو ئه‌و گومانێن ل ده‌ڤ خه‌لكى په‌یدابووین سه‌باره‌ت هشكه سالیێ ل هه‌رێما كوردستانێ دووره ژ راستیێ، چونكى وه‌رزى باران بارینێ هێشتا یێ مایى.
