به‌ربژارێ پۆستێ وه‌زیرێ ده‌رڤه یی ئه‌مریكا د كابینا جۆ بایدنى دا به‌رى ده‌ست بكاربیت گه‌فان ل توركیا دكه‌ت.
ئه‌نتۆنى بلینكن، به‌ربژارێ پۆستێ وه‌زیرێ ده‌رڤه یێ ئه‌مریكا د كابینا جۆ بایدنى دا ب پێدڤى دزانیت واشنتۆن هه‌لسه‌نگاندنێ د سه‌پاندنا سزایان ب سه‌ر ئه‌نقه‌رێ دا بكه‌ت.
بلینكن گۆت، پێدڤییه ئه‌مریكا چاڤدێرییا وان سزایان بكه‌ت یێن ل سه‌ر توركیا سه‌پاندین دا بزانیت كارتێكرنا وان چه‌نده، د دوڤ دا ژى بریارێ ل سه‌ر وی یه‌كێ بده‌ت سزایێن زێده‌تر ب سه‌ر ئه‌نقه‌رێ دا ب سه‌پینیت یان نه.
دیار ژى كر، كرینا سیسته‌مێ به‌رگریێ یێ ئێس 400ێ رۆسیا ژلایێ توركیا ڤه جهێ قه‌بوولكرنێ نینه.
هه‌یڤه‌كێ به‌رى نها ئه‌مریكا ژ ئه‌گه‌رێ كرینا سیسته‌مێ به‌رگرییا رۆسیا بریارا سزایان ل سه‌ر توركیا دا، ل رۆژا 14ى كانوونا ئێكێ یا سالا 2020ێ ئه‌مریكا هژماره‌كا به‌رپرسێن پیشه‌سازى یێن به‌رگرییا توركیا ئێخستنه ناڤ لیستا سزایان.
ل سالا 2017، توركیا بۆ كرینا سیسته‌مێ به‌رگرییێ ئێس400 گرێبه‌سته‌ك دگه‌ل رۆسیا ئیمزاكر، ئه‌مریكا به‌رده‌وام سزایان ل سه‌ر توركیا ددانیت كو ژ وێ بریارێ په‌شیمان بیت، لێ سه‌رۆككومارێ توركیا ئاشكرا دكه‌ت، پشتى ئه‌مریكا سیسته‌مێ به‌رگرییێ یێ پاتریۆت نه‌دایه وان، وان شونگره‌ك بو خوه دیتییه و ژ وێ بریارا خوه په‌شیمان نابن.
