جڤاتا نوونه‌رێن ئیراقێ ئه‌ڤرۆ دێ ده‌نگی ل سه‌ر قانوونا رزگاربوویێن ئێزیدی یێن ده‌ستێ داعشێ ده‌ت، هژمارهكا رزگاربوویان ژی ل به‌غدانه.
خالیدا خه‌لیل، ئه‌نداما جڤاتا نوونه‌رێن ئیراقێ ل سه‌ر لیستا پارتی تایبه‌ت بۆ خانی نیوز راگه‌هاند؛ جڤاتا نوونه‌ران ئه‌ڤرۆ سات 3 د كۆمبوونا خوه دا دێ ده‌نگی ل سه‌ر قانوونا رزگاربوویێن ئێزیدی یێن ده‌ستێ داعشێ ده‌ت پشتی بوورینا ساله‌ك و نیڤان ل سه‌ر پرۆژه‌ی و بزاڤێن مه‌زن یێن حكومه‌تا هه‌رێمێ دگه‌ل سه‌نته‌رێ جینۆسایدێ ل دهۆكێ كو ل ده‌ستپێكێ خواندنه‌ك بۆ پرۆژه‌ی هاته كرن ل سه‌ر 206 كچێن رزگاربووی وه‌كو نموونه وه‌رگرتن و پرۆژه ژی ل سه‌ر بۆچۆن و داخوازیێن رزگاربوویان هاتییه دانان.
نوونه‌را ئێزدییان ل جڤاتا نوونه‌ران ل دۆر قه‌ره‌بووكرنا رزگاربوویان ئاشكه‌را كر، رزگاربووی دێ مفای ژ قانوونێ بینن كو مووچه‌كێ مه‌هانه وه‌كو خانه‌نشینكری یێ نه‌كێمتر ژ 800 هزاران بۆ وان بهێت دابینكرن، هه‌ر رزگاربوویه‌ك دێ پارچه‌كا ئه‌ردی وه‌رگریت، هه‌روه‌سا هه‌ر رزگاربوویه‌كا بخوازیت خواندنا خوه ته‌مامبكه‌ت گه‌ر ژیێ وێ مه‌زن ژی ببیت مافێ وێ هه‌یه بخوینیت و ل ده‌مێ پێشكێشی كاره‌كی ژی بكه‌ت دێ به‌راهییا وه‌رگرتنێ بۆ وێ بیت، دیسان ژ ئالیێ ساخله‌میێ ژی ڤه هه‌موو رێكار دێ بۆ وان هێن دابینكرن كو د بنه هه‌مان ماف و ئیمتیازاتێن زیندانیێن سیاسی و نها ژی هژمارهكا رزگاربوویان ل به‌غدانه ژ بۆ پرۆگرامێ وه‌زاره‌تا ناڤخۆ یێ وه‌رگرتنا چاره‌سه‌رییا ده‌روونی.
خالیدا خه‌لیل، گۆت ژی: پشتی میرێ ئێزدییان و جڤاتا رۆحانی ب رژدی داخوازا بجهئینانا قانوونا رزگاربوویان كری، وێ وه‌كو نوونه‌را رزگاربووی و ئێزیدییان بزاڤه‌كا مه‌زن ل سه‌ر پرۆژه‌ی كرییه تاكو مافێن رزگاربوویان بۆ وان ڤه‌گه‌رینن و ببیته قه‌ره‌بوویه‌كا بچووك ل هه‌مبه‌ر قوربانیدانا وان، هه‌روه‌سا لژنه‌یێن شه‌هید و قوربانییان و یاسای ل جڤاتا نوونه‌ران زۆر دهاریكاربوون تاكو ڤی پرۆژه‌ی سه‌ركه‌فتن ئینای و ئه‌و بهیڤی نه د كۆمبوونا ئه‌ڤرۆ دا هه‌موو په‌رله‌مانتار ده‌نگی ل سه‌ر بده‌ن بێی رێگری و مافێ رزگاربوویان به‌رزه نه‌بیت و هه‌روه‌سا پێدڤییه قانوونه‌كا جینۆسایدێ یا تایبه‌ت ب ئێزدییان ژی بهێته دانان.
