رێڤەبەرێ ناوچهدارییا سنۆنێ بۆ خانی نیوز راگههاند: ھندەک ژ خەلکێ شنگالێ و دەوروبەران و موختارێن گوندان گازنده کرینە كو سه ل دەڤەرێن وان زێدەبوونە و بووینە ترس ل سەر ژیانا وەلاتییان و زارۆکان، ل ھندەک گوندان زارۆک نهشێن ژ مال دەرکەڤن و بچنە قوتابخانان و دترسن، ھەروەسا پەز و مریشکێن خەلکی ژى دخۆن.
ناڤهاتى گۆت ژى: پشتی ڤێ داخوازیێ ب بریارەکا ئیداری یا ڤێتەرنەرییا مووسلێ ھەوەکا ھەڤپشك ژ کارمەندین ڤێتەرنەری و پۆلیس و باژێرڤانیێ ل شنگال و دەوروبەران ھاتیە پێکئینان بۆ کوشتنا سەیێن بهرداى.
د. خەلەف حەیدەر، رێڤەبەرێ ڤێتەرنەرییا سنونێ و ئەندامێ لژنا ژناڤبرنا سەیان بۆ خانی نیوز راگەھاند: بەریا دوو رۆژان وان ب رێکا تیمەکا ھەڤبەش دەست ب کوشتنا (سە) یێن بەرەلا ل سنوونێ کریە، نێزیکی پێنجی (سە) ب رێکا ژەھرکرنێ ھاتنە کوشتن.
دکتور خەلەفى گۆت ژى: ههتا نوكه چ وەلاتی ب دەڤێ (سه)ـیان زیان پێ نەکەفتییە.
گۆت ژی: نھا ئەم کەفتینە دناڤبەرا دوو ھەلویستان دا، بەشەکێ خەلکی دژی کوشتنا سەیان دەرکەفتینە و نەرازیبوونا خوە دیارکریە و دبێژن ئەوا دھێتەکرن دژی مافێن ئاژەلانە. ژلایەکێ دیڤە ژی بریارا کارگێری یا پارێزگەھا مووسلێ یه.
ژلایێ خو ڤە ژی (بەسام کتی) ئیک ژ چالاکڤانێن سنونێ بۆ خانی نیوز دیاردکر: ئەو وەکو ھژمارەکا چالاکڤانان دژی کوشتنا سەیا دەرکەفتینە کو مافێ ئاژەلان دھێتە بەرزەکرن، ئهو دخوازیت جھەکێ تایبەت بۆ سەیێن بەرەلا بھێتە چێکرن و ل وێری بھێنە کۆمڤهکرن، ههروهسا ئهو خارنا ل بەر خارنگەهـ و مالان زێدەدکەت بدەنه سهیان.
بەسام دیارکر ژی: د ڤێ ھەوێ دا نێزیکی ٢ ھزار (سە) ھاتینە کوشتن ب بەھانەیا زیان گەھاندەن ب وەلاتیان، لێ تا نھا چ وەلاتی ژلایێ سەیان ڤە نههاتینه ئازاردان و زیان نەگەھاندینه كهسێ.
د. سلێمان تەمەر بەرپرسێ رێکخراوا پاراستنا مافێن ئاژەلان بۆ خانى نیوز گۆت: کوشتنا سەیان ب رێکا ژەھرێ و چەکی ل جیھانێ یا قەدەغەکریە، زوردارییە ل سەر مافێن ئاژەلان و مرۆڤی و ژینگەھێ.
ناڤهاتى گۆت ژی ل دووڤ یاسایا ژمارە ٤٨ یا سالا ١٩٨٦ یا ئیراقێ رێک دایە سەیێن بەرەلا بھێنە کوشتن، لێ چارەسەریا گونجایی بۆ ڤێ بابەتی تنێ خەساندنا سەیێن نیرە کو سە زێدە نابن و زیانێ ژی ناگەھینن، چونکە ل ھەموو وەلاتێن پێشکەفتی ڤی رێکی بکار د ئینن.
خانى نیوز، عهبدولا عهلى
