شێلادزێ ژ روویێ ئاکنجیبوویان ڤە ئێک ژ مەزنترین ناوچەداریێن سەر ب پارێزگەھا دھۆکێ ڤەیە و ب سەدان قوتابیێن خەلکێ شێلادزێ ل زانکۆیێن جودایێن هەرێما کوردستانێ دخوینن و رۆژانە پێدڤی ب ژێدەرێن زانستی و دیرۆکی دبن ژبۆی دروستکرنا راپۆرت و ڤەکۆلینێن دەرچوونێ، لێ ژبەر نەبوونا چ پەرتۆکخانێن گشتی پەنایێ دبەنە بەر سەنتەرێ باژێرێ دھۆکێ.
ھونەر عومەر ئێک ژ قوتابیێن کۆلیژا پەروەردا بنیاتە بۆ خانى نیوز دبێژیت: ھەبوونا پەرتوکخانەیەکا گشتی ل شێلادزێ ژ پێدڤیێن فەرە ب تایبەتی بۆ وان قوتابییان کۆ رۆژانە پێـدڤی ب چەندین ژێدەرێن جودا دبن و زوو ب زوو ب دەست وان ناکەڤنـ لەورا ئەو نەچارن بەرەف باژێرێ دهۆکێ ڤە بچن بۆ ب دەست ڤە ئینانا پەرتوکەکی، ئەڤە ژی دبیتە ئاستەنگ و خەرجیێن زێدەتر دچن. لێ ئەگەر پەرتوکخانەیەکا گشتی ھەبا دا کارێ وان ھەر ل بەر دەرێ مالا وان برێڤە چیت. لەورا ئەو داخازێ ژ جھێن پەیوەندیدار دکەن کو پەرتۆکخانەیەکا گشتى بۆ وان ڤەکەن.
ھشیار حەجی زەینەل مامۆستایێ کۆلیژا بنیات ئامێدیێ دبێژیت: ڤەکرنا پەرتوکخانەیەکا گشتی ل شێلادزێ گەلەکا گرنگە بۆ خەلکی ب گشتی و قوتابیان ب تایبەتی، ژبەر کۆ پەرتوکخانا کۆلیژێ تێرا وان قوتابییان ژێدەر تێدا نینە کو بشێن راپۆرت و ڤەکۆلینێن خۆ ئامادەبکەن، گەلەک جاران نەبوونا ژێدەران بووینە ئاستەنگ ل ھەمبەری قوتابییان، لەورا ھەبوونا وێ ژپێدڤیێن سەرەکی یە و گرنگیا خویاھەی و ئاستێ رەوشەنبیری ژی دێ بەرەف پێش ڤە چیتن.
ل دووماھیێ مە گازندەیێن وان گەھاندنە ئیسماعیل تاھر جانگیر رێڤەبەرێ پەرتوکخانا بەدرخانییان ل دھۆکێ و ب ڤی ئاوایی بەرسڤ دا: ھەر ژ سالا ٢٠١٦ێ وان پلانا ڤەکرنا پەرتوکخانا شێلادزێ ھەبوو و دگەل چەندین جھێن دی، لێ ژبەر چەند ئەگەرەکان نەھاتنە ڤەکرن، ژوان ژى نەبوونا جھێن تایبەت و فەرمانبەر و بودجەیا پێدڤی کو ھەرێما کوردستانێ کەفتە د قەیرانەکا دارایی دا.
ناڤهاتی گۆت ژی: پشتەڤانی د وان بیاڤان دا نەبوویە، چونکى وان پێنچ ھزار پەرتوک ژى بۆ شێلادزێ یێن دابینکرین، لێ ژبەر وان ئاستەنگان ئەو نەشیاینە پەرتوکخانێ ڤەکەن. پەرتوکخانە ژی دڤێت رۆژانە یا ڤەکری بیت و فەرمانبەرێن خۆ و بودجەیا خۆ یا تایبەت ھەبیتن دا کو خزمەتا خەلکی بکەت.
خانى نیوز، سامى رێکانى
