٨٢ سال ل سەر رادیۆیا کوردی یا بەغدا دا دەرباز دبن، پشتی کەفتنا رژێما بەعس ھەتا نوکە ئەو رادیۆ ژ پەخشی ھاتییە راوستاندن، ئەرشیفێ ٦٤ سالان یێ رادیۆیێ بەرزەبوویە و کەسەک نوزانیت ل کیڤەیە.
جەمال بەرواری، بێژەرێ رادیۆیا کوردی بەغدا، بۆ خانی نیۆز گۆت: رادیۆیا کوردی ٢٩/١/١٩٣٩ ل بەغدا ھاتیەدانان، دەسپێکێ پشکەک بوو ل گەل رادیۆیا بەغدا بۆ ماوێ ١٥ خولەکان، پاشی زێدەبوو بۆ ٣٠ خولەکان، پشتی بەیانا ١١ ئادارێ یا ١٩٧٠ بوو رێڤەبەریەکا سەربەخۆ وەک رادیۆیا عەرەبی ل بەغدا و چەندین پشک بخوە ڤە گرتن وەک (بێژەران، رەوشەنبیری، ھەمی رەنگ، گوندان، پەرتووکخانە، تەنسیق).
بەرواری ئەو ژی ئاشکراکر کو پەخشێ رادیۆیێ ل پێنج و نیڤی سپێدێ دەست پێکر ب دەنگێ کەوی پشتی قورئانا پیرۆز بۆ ماوێ ٣٠ خولەکان و دووڤدا فەرمودەکا ئاینی دەسپێدکر و ھەر جارەکێ مامۆستایەکێ ئاینی ئەو گوتار پێشکێش دکر و ژ ئەوان مامۆستایان ژی (شێخ بەحمید ئەترۆشی، شێخ عومەر مولود دیبەگەی، ئەبو زەید مستەفا سندی، شێخ شەعبان گولی، شێخ ئەیوب درباس) دووف دا پرۆگرامێ سپێدەباش دەسپێدکر و بەردەوام بوون ھەتا دوی شەڤێ.
جەمال بەرواری ئەو ژی گۆت: پتریا نڤیسەر و رەوشەنبیریێن کورد پشکداری پرۆگامێن رادیویێ دبوون ( د. بدرخان سندی، د. رەشید فندی، د. نسرین فەرخی، عەبدوالقادر قەزاز، مەحفوز مایی، د. عزەدین مستەفا رەسول، خالد محەمەد شەریف، جەعفەر مایی، محەمەد سەلیم سواری، نسرەت ھادی، د. شەوکەت سندی، کەمیلا عەلی)
جەمال بەرواری ئەو ژی گۆت: ھونەرمەندێن کورد ل بەغدا ماف ھەبوو ھەیڤێ سترانەکێ توماربکەن، ھەکە یێن پارێزگەھێن دی بان ژی، ئەوان ماف ھەبوو ھەیڤی دو سترانا تۆمارکەن، ژ وان ھونەرمەندێن سەردانا ئێزگێ کوردی ل بەغدا کرین، ( محەمەد عارف، عیسا برواری، گولبھار، ئەیاز یوسف، ئەردەوان زاخولی ، تەحسین تەھا، عەبدوللا زێرین، سەمیر زاخۆیی، بشار زاخۆیی، نەسرین شێروان، محەمەد تەیب تاھر، غانم سیتو، ئیسماعیل جومعە، شاکر ئاکرەیی، کەمال ئاکرەیی، میران ھەرکی، رەسول گەردی ، تاھر توفیق، ژیان ئەحمەد، فەوزیا محەمەد، براھیم حەسەن، حەسەن جزیری، ئەنوەر قەرداغی، کەریم کابان، محەمەد جەزا، قادار کابان) گەلەکێن دی ژی ب ھەمان شێوە خزمەتا ھونەرێ کوردی کریە، وەک (تیپا دھۆک یا مۆزیکێ) ب سەرپەرشتیا ھونەرمەند ( دلشاد محەمەد سەعید) و تیپێن مۆزیکێن (ھەولێر و سلێمانیێ) تیپا مۆزیکێ (باوەجی) ل باژێرێ کۆیە.
ناڤھاتی گۆت ژی: زێدەباری ھونەرێ سترانێ، پشکا ھونەرێ شانویێ ژی رۆلەکێ بەرچاڤ ھەبوو، ژ ھونەرمەندێن ئەڤان کاری بکەن، (فەرھاد شەریف، ھاشم عەلی مەندی، فازل قەساب، ئەحمەد محەمەد عەلی، نەسرین مەرجان) گەلەکێن دی.
بەرواری ئەو ژی ئاشکراکر کو ژوان بێژەرێن دێرین ل وی سەردەمی، ( کامل کاک ئەمین) ئێکەم بێژەرێ کورد بوو ل بەغدا ل پشت مایکرفونێ راوستیایی، ھەروەسا (سادق بھائەدین، محەمەد ئەمین ئوسمان، مەحمود مفتی، محەمەد سەدیق ئیمام، سەگڤان عەبدوالحکیم، نھایە جەلال، عەبدوللا عەباس، عەبدولوەھاب تەلەبانی، جەمال بەرواری، نازم سلێمان جخسی، موفق سلێمان بەرواری، خالد خوشناو، موئەیەد تەیب، جەعفەر ئیبراھیم ئێمینکی)
جەمال بەرواری گۆتژی: پشتی کەفتنا رژێما بەعس ل سالا ٢٠٠٣ ئیسماعیل گەیلانی ھاتە بەغدا و ل گەل چوومە ئێزگێ کوردی، ئەرشیفێ ٦٤ سالا یێ ستران و چاف پێکەفتن بخوە ڤەدگرتن و ئیسماعیل گەیلانی ئەو ئەرشیف گەھاندە ھەولێرێ، دووڤ دا ئیسماعیل گەیلانی وەغەرکر، کەسەکێ نەزانی وی ئەو ئەرشیف چلێ کریە، فرۆشتن یان دانە ئێکی، ژ ٢٠٠٣ ھەتا نوکە رادیۆیا کوردی ھاتیە راوستاندن و کار ناکەت، لێ رادیۆیا دەنگێ جەماھیری و یا بەغدا دەست ب کارێن خوە کرنە ڤە.
گۆت ژی: وی گەلەک بزاڤکرن ب رێکا لقا پارتییا دیموکراتا کوردستانێ ل بەغدا ئەڤ رادیۆیە بزڤریتەڤە لێ یا بێ مفا بوو.
خانی نیوز، سالار محەمەد دۆسکی
