شاندا دانوستانكارا ههرێما كوردستانێ سوبه ئێكشهمبى دێ سهرهدانا بهغدا كهت و جارهكا دى دگهل لیژنا دارایى و لایهنێن دیێن ئیراقێ كۆم بیت بۆ گۆتوبێژان ل سهر پشكا ههرێمێ د بودجا سالا 2021ێ دا.
عهبدولحهكیم خسرۆ، بهرپرسێ ئۆفیسا ههماههنگیێ و پێداچوونێ ل ههرێما كوردستانێ راگههاند، سوبه ئێكشهمبى شاندا ههرێمێ ب مهرهما دانوستاندنان ل گهل حكومهتا بهغدا دهربارهى بودجهى و مافێن دارایێن ههرێما كوردستانێ ب سهرۆكایهتییا قوباد تالهبانى، جێگرێ سهرۆكوهزیران دێ چیته بهغدا.
گۆت ژى: گۆتوبێژ د بهردهوامن ب ئاراستا هندێ كو بگههنه رێككهفتنهكێ ل سهر بنهمایێ دهستورى كو مافێن دارایێن ههرێما كوردستانێ دابین بكهت.
دوماهی سهرهدانا شاندێ ههرێما كوردستانێ بۆ بهغدا دگهل لیژنا داراییا پهرلهمانێ ئیراقێ كۆم ببوو، و كۆمبوون ژى یا تایبهت بوو ب پشكا ههرێما كوردستانێ و دوسهیێن پهترۆلێ د پرۆژه قانونا بوجهیدا.
پهرلهمانتارێن كورد ل پهرلهمانێ ئیراقێ، هۆشداریێ ددهن كو چارهسهرنهكرنا كێشا پهترۆلێ د چوارچووڤێ مافێن دهستوریێن ههرێمێ دا، د پاشهرۆژێ دا دێ باجا وان یا مهزن بیت، ژبهر وێ یهكێ داخواز دكهن ههرێما كوردستانێ ب رادهستكرنا پهترۆلێ بهرامبهرى پشكا ههرێما كوردستانێ پێگیر بیت.
ماددێن 10 و 11 ژ پرۆژهقانوونا بودجا 2021ێ یا ئیراقێ تایبهت كرییه ب پشكا ههرێما كوردستانێ، ههولێر یا پێگیره ب رادهستكرنا 250 هزار بهرمیلێن پهترۆلێ رۆژانه و نیڤ داهاتێ ژبلى پهترۆلێ د بهرامبهر دا پشكا ههرێمێ 12.67 ژ لایێ بهغدا ڤه دێ هێته رهوانهكرن.
