ئەندامه‌كێ جڤاتا نوونه‌رێن ئیراقێ ژ فراکسیۆنا پارتی دیمۆکراتی کوردستان بۆ خانى نیوز دیار کر، لژنا دارایی ل جڤاتا نوونه‌ران ھند کێشە ل گەل پشکا بودجا ھەرێما کوردستانێ نینن، لێ ھندەک ئالیێن سیاسی ماینە و ھێشتا ھەموو تشت ئێکلا نەبووینە.
دكتور دیار ته‌یب به‌روارى دیار کر، لژنا دارایی ل جڤاتا نوونه‌ران دڤێت ھندەک جۆرێن مەزاختنان کێم بکەت، داخواز ژى ژ جڤاتا وەزیران کرییە ھندەک جۆرێن قەران نه‌كه‌ن، جڤاتا وەزیران ژى پرۆژەقانوونا بودجه‌ى ب ١٦٤ ترلیۆن دیناران دیار کرییە و لژنا دارایی ژی دخوازیت بکەتە ١٢٥ یان ١٣٠ ترلیۆن، ئەو قانوونە دێ ھەموو مەزاختیان ب خوەڤە گریت و دێ ھەرێما کوردستانێ ژی ڤه‌گریت.
د. دیار ته‌یب گۆت ژی: ئالیێن شیعی بزاڤان دکەن گوھۆرینێ د برگێن ١٠ و ١١ یێن پرۆژەقانوونا بودجەی دا بکەن، ھندەک ئالیێن شیعی دخوازن ھەرێما کوردستانێ رۆژانە پتری ٢٥٠ ھزار بەرمیلێن په‌ترۆلێ راده‌ستى کۆمپانیا سۆمۆ بکەت، هه‌كه نه ئه‌و دێ برگەکا نوو زێدە کەن و پشکا ھەرێمێ ناهنێرن، گەلەک ئالیێن شیعی یێ بزاڤان ژى دکەن، ئەو قه‌رێن ھەرێمێ ل سەر حکومەتا ئیراقێ یێن سالێن ٢٠١٤ ھەتا ٢٠١٩ێ دناڤا پرۆژەقانوونێ دا نە بیت و دبێژن ھەرێمێ چو قه‌ر ل سەر ئیراقێ نینن.
به‌روارى گۆت ژى: پارتی و ئێکەتی و ھندەک ئالیێن ئیراقی ژی ل گەل وێ یه‌كێ نە کو مادێن ١٠ و ١١ نەھێنە گوھۆرین، لێ ئالیێن شیعی کێمکرنا پشکا ھەرێمێ بۆ خوە وەکو دەستکەفت دبینن و دخوازن ئاریشان د ناڤبەرا حکومەتا ھەرێمێ و حکومەتا کازمی دا دروست بکەن، داکو تۆلا خوە ژ کازمی ڤەکەن و ئەو پەیوەندیا دناڤبەرا ھەرێمێ و کازمی دا ھەی لاواز بکەن، ھەروەسا ھەتا نوکە شاندێ ھەرێما کوردستانێ خەمساری نەکرییە و ل گەل ھەموو ئالیێن ئیراقی گوتۆبێژ کرینە، نوکە چاڤەرێ ئالیێن شیعی دکەن کا دێ چ ھەلویست هه‌بیت، ژبه‌ركو ئەو خودان دەستھەلات و دانانا قانوونانە ل ئیراقێ.
خانى نیوز، زنار تۆڤى
