ئەڤرۆ ئێکشەمبی ٧-٢-٢٠٢١ێ، مەسرور بارزانی، سەرۆکێ حکومەتا ھەرێما کوردستانێ پێشوازی ل نادیە موراد، چالاکڤانا ئێزدی و رزگاربوویا دەستێ داعش کر.
د دیدارەکێ دا سەرۆکێ حکوومەتا ھەرێما کوردستانێ، دووپاتکر کو حکومەتا ھەرێمێ، ھەموو بزاڤێن خۆ تەرخانکرینە بۆ کێمکرنا ئازار و نەخۆشیێن خوشک و برایێن ئێزدی و دابینکرنا ژیانەکا ھەژی بۆ وان و ڤەگەریانا ئاواران بۆ جھێن وان،.
سەرۆکێ حکومەتێ گۆت ژی، ئێزدی پێکھاتەیەکا رەسەن و گرنگا گەلێ کوردستانێ نە و ھەرێما کوردستانێ ژی ھەردەم پشتەڤانییا داخوازیێن وان دکەت و ب سەدەھان پێشمەرگە سەخمەراتی رزگارکرنا شنگالێ شەھید بووینە، ژبەر ھندێ پێدڤییە رەوشا شنگالێ ئاسایی ببیت و ئارامی بۆ وێ دەڤەرێ ڤەگەریتە ڤە.
ژلایێ خۆڤە، نادیە موراد جەخت ل سەر گرنگی و چرکرنا بزاڤان کر بۆ ڤەدیتنا ژن و کچێن ھاتینە رەڤاندن، داخواز ژی کر کو ب زووترین دەم رێککەفتناما شنگالێ بھێتە جێبەجێکرن، ژبۆ سەقامگیربوونا دادپەروەریێ و ئاشتیێ ل دەڤەرێ.
