ساخله‌مییا ئیراقێ دخوازیت دەستپێکرنا خواندنی ب شێوێ ئۆنلاین بیت

وەزارەتا ساخلەمییا ئیراقێ، پێشنیارا داخستنا ھندەک جھێن گشتی و دەستپێکرنا خواندنێ ب شێوێ ئۆنلاین کرییە.

ریاز عەبدولئەمیر، رێڤەبەرێ ساخلەمییا گشتی ل وەزارەتا ساخلەمییێ و ژینگەھا ئیراقێ، بۆ ئاژانسا نووچەیێن فەرمی یا وەلاتێ خوە راگەھاندییە، وان چەند راسپاردەک بۆ لژنا بلند یا بەرھنگاربوونا کۆرۆنایێ بلند کرییە، ژ پێخەمەت رێگریکرنێ ل بەلاڤبوونا زێدەتر یا ڤایرۆسێ کۆرۆنایێ.

ھەروەسا گۆتییە، ئەو راسپاردە پێکھاتینە ژ داخستنا ھندەک جھێن گشتی و دەسپێکرنا خواندنێ ب شێوێ ئۆنلاین، ل قوتابخانا و زانکۆیان ‌ئەگەر رەوش ژ دەست دەربکەڤیت دێ قەدەغەیا ھاتنوچوونا سنۆردار ھێتە راگەھاندن.

ل دووڤ وێ راپۆرتێ، ھەتا نوکە ٦٣٠ ھزار و ٢٦٣ کەس ل ئیراقێ تووشی ڤایرۆسێ کۆرۆنایێ بووینە و ١٣ ھزار و ١٢٦ کەسان ژی ب کۆرۆرنایێ وەغەر کرینە.