بەری چەند رۆژەکان ئەندامەکێ سەرکردایەتییا ئێکەتیێ راگەھاندبوو کو ل گوندێ بەرچی یێ سنورێ ئامێدیێ ب تنێ مالەکا ئێکەتیێ ھەبوو، لێ پارتی ب رێکا موختارێ گوندی گۆتییە وی کەسێ ئێکەتیێ ئەگەر ئەو نەبیتە پارتی، نابیت ئیدی چێلا خۆ بینیتە ناڤ گارانا گوندی.
ل دۆر ڤان ئاخفتنێن ئەندامێ سەرکردایەتییا ئێکەتیێ، خانی نیوز پەیوەندی ب موختارێ وی گوندی کر، ناجی مەحموود موختارێ گوندێ بەرچی بۆ خانی نیوز راگەھاند: ھیچ راستییەک بۆ وان ئاخفتنان نینە و ئەو ڤێ یەکێ رەتدکەن و بۆ ڤێ مەرەمێ ژی وان سەرەدانا کۆمیتەیا ئێکەتیا نشتیمانیێ ل ئامێدیێ کریە و پەیاما خۆ ب نڤێسین دایە کۆمیتەی کو دێ سکالایا یاسایی تۆمارکەن ئەگەر ب فەرمی لێبۆرینێ ژ خەلکێ گوندێ بەرچی نەخوازن.
موختارێ بەرچی دیارکر ژی: ھەرچەندە ب وان ھاتییە راگەھاندن کو دێ داخازا لێبورینێ ژ ھەوە کەین، لێ ئەگەر لێبۆرینا وان ب نڤێسارا فەرمی نەبیت ئەو دێ رێکارێن یاسایی گرنە بەر و سکالایێ تۆمارکەن چونکە ئەوی بەرپرسێ ئێکەتیێ سڤکاتی ب خەلکێ گوندێ بەرچی کریە.
ناجی مەحموود گۆت ژی: ئەو دبێژن ئەڤ چیرۆکە ژ بۆ سالا ٢٠٠٥ ڤەدگەریت، لێ موختارێ وی دەمی یێ ساخە، ھەروەسا جڤاتا گوندێ وان ژ ١٢ بنەمالان پێک دھێت، ئەو ھەموو رونشتینە و ھیچ کەسەک ھایداری ڤێ یەکێ نەبوویە، ئەگەر ئەڤ بابەتە ھاتبیتە بەحسکرن ژی، رەنگە ژ لایێ کەسەکێڤە بیت کو دەربرینێ ژ جڤاتا گوندی و پارتی ناکەت.
ناڤھاتی گۆت ژی ل گوندێ وان رێز ل ھەموو بیروباوەران دھێـتەگرتن و ئەو وەکو جڤاتا گوندی بێی ل بەرچاڤگرتنا لایەنێ ئۆلی و سیاسی و نەتەوی، ھاریکارییا ھەموو کەسەکی دکەن و نھا ژی ئالایێ ئێکەتیێ ل سەر مالا وی کەسی یێ بلندە و وان ھیچ جارەکێ ژی بێ رێزی ل بەرامبەری وی نەکریە.
ژلایێ خۆڤە ژی ھەوار ئامێدی بەرپرسێ کۆمیتەیا ئێکەتیێ ل ئامێدێ بۆ خانی نیوز راگەھاند: ئەو دێ ئاریشەیا خۆ ل گەل موختارى و خەلکێ گوندێ بەرچی چارەرسەرکەن.
خانی نیوز، عەبدولا عەلی
