شاندەکێ پەرلەمانێ کوردستانێ کۆ ژ نوونەرێن ھەموو پێکھاتەیێن ئاینی و نەتەوەیی پێکھاتبوون سەرەدانا پارێزگەھا دھۆکێ کرن، دگەل ھەر ئێک ژ پارێزگارێ دھۆکێ و سەرۆکێ جڤاتا پارێزگەھێ کۆمبوون، پاشان سەرەدانا ھەژمارەکا کەنیسەیێن کلد و ئاشۆری و سریان و ئەرمەنان، ل دووڤ دا سەرەدانا دەڤەرداریا شێخان و میرێ ئیزدیان کرن.
عەلی تەتەر پارێزگارێ دھۆکێ خۆشحالییان خۆ بۆ سەرەدانا شاندێ پەرلەمانێ کوردستانێ دیارکر و راگەھاند: د درێژاھیا مێژوویێ دا ھەرێما کوردستانێ و پارێزگەھا دھۆکێ جھێ پێکڤە ژیانا ھەموو پێکھاتەیێن ئاینی و نەته‌وەیی بوویە، دێ ھەروەسا مینیت و ب ھێزتر بیت و چ منەتەک ژی نینە دگەل وان دھێتەکرن.
مونا قه‌هوه‌چى سکرتێرا پەرلەمانێ کوردستانێ کۆ سەرۆکاتییا شاندی دکر مەرەما سەرەدانا خوە بۆ پارێزگەھا دھۆکێ بۆ خانی نیوز راگەھاند: ئارمانجا وان ئەوە پتر بشێن پەیوەندی و رێکخستنا کارێن پێکھاتەیان بکەن و ژ نێزیک ڤە ھایداری ژین و ژیارا خەلکێ دەڤەرێ ببین.
کلارا عەودیشۆ ئەنداما پەرلەمانێ کوردستانێ ژى یاوەریا شاندی دکر بۆ خانی نیوز دازانین: دێ ھەموو بزاڤان کەن گله و گازندێن ھەموو پێکھاتەیێن دەڤەرێ وەرگرن و بگەھینینە پەرلەمانی کو پتر بشێن خزمەتا خەلکێ خۆ بکەین.
خانى نیوز، عه‌بدوللا عه‌لى
