ئه‌ردوگان: ئه‌مریكا پشته‌ڤانییا په‌كه‌كێ دكه‌ت  

سه‌رۆك كۆمارێ توركیا راگه‌هاند: ئه‌مریكا ب ئاشكرایی پشته‌ڤانیێ ل په‌كه‌كێ و یه‌په‌گێ‌ و په‌یه‌دێ دكه‌ت و گۆت ژى: هه‌كه‌ واشنتۆنێ بڤێت هه‌ڤپه‌یمانیا توركیا ل گه‌ل ناتۆ یا به‌رده‌وام بیت، دڤێت ده‌ست ژ پشته‌ڤانیا په‌كه‌كێ به‌رده‌ت .
ئه‌ردۆغانى گۆت ژى: كوشتنا وه‌لاتیێن مه‌ده‌نى یێن توركیا دێ به‌رده‌وام بیت هندى ئه‌مریكا پشته‌ڤانیێ ل وان گرۆپان بكه‌ت، ئه‌ڤه‌ د ده‌مه‌كێ دایه‌ ل حه‌فتییا بورى سۆپایێ تورکیا ئۆپەراسیۆنا پەنجێ ئەلهۆى ل چیایێ گارەى دەستپێکربوو، دوهى سۆپایێ توركى  ئه‌و ئۆپەراسیۆن ب دووماهی ئینایه‌، سوپایێ تورکیا دیار كرییه‌ پەکەکێ ١٣ ئێخسیرێن وان کوشتینە، د هه‌مان ده‌مدا پەکەکێ ژى ئه‌و چه‌نده‌ رەتكرییه‌ و دایه‌ دیار كرن، كو فرۆكێن تورکیا ئه‌و ئێخسیره‌ کوشتینە.

وەزارەتا دەرڤە یا ئەمریکا ژى کوشتنا وان ئێخسیرێن توركى یێن كو د ده‌ستىێ په‌كه‌كێ دابوون ئیدانە کرییه‌ و راگەهاندیه‌، ئەو ب گومانن پەکەکێ ئەو ئێخسیرە کوشت بن.

سه‌رۆك كۆمارێ توركیا دەربارەى هەلویستێ ئەمریکا گۆت: هوین دبێژن ئەم پشتەڤانیا پەکەکێ و پەیەدێ و یەپەگێ ناکەین، لێ یا دیار و ئاشكرایه‌ کو هوین پشتەڤانیێ لێ دکەن.