ل گۆرى راگەهاندنا سەرۆکاتییا هەرێمێ ئەڤرۆ دووشەمبی ١٥-٢-٢٠٢١ نێچیرڤان بارزانى سەرۆکێ هەرێما کوردستانێ پێشوازى ل برۆنۆ ئۆبێرت بالیۆزێ فەرەنسا و ئۆلى دیێل بالیۆزێ ئەلمانیا ل ئیراقێ کر.
د کۆمبوونێ دا پەیوەندیێن هەرێما کوردستانێ ل گەل ئەلمانیا و فەرەنسا، رەوشا سیاسى و ئێمناهییا ئیراقێ، ئاریشەیێن هەولێر و بەغدایێ و گۆتوبێژێن چارەسەرکرنا بابەتێ پشکا هەرێمێ د بۆدجەیا گشتى یا ئیراقێ یا سالا ٢٠٢١ ، رەوشا دەڤەرێن مادەیا ١٤٠، مەترسیێن سەرهلدانا تیرۆرێ و کردارێن تیرۆرستى، ئەرک و بەرنامەیێ ناتۆ ل ئیراقێ، بەرهنگاربوونا ڤایرۆسێ کۆرۆنایێ و لێکەفتێن وێ، ئالنگاریێن هەمبەرى ئیراقێ و هەرێما کوردستانێ، هەلبژارتنێن بهێـت یێن ئیراقێ و رۆلێ نەتەوێن ئیکگرتى د ئەڤى بیاڤى دا هاتنە گۆتوبێژکرن.
راگەهاندنا سەرۆکاتییا هەرێمێ ئاماژە کریە: د کۆمبوونێ دا رۆل و کاریگەرییا ئێکەتییا ئەورۆپا و کۆمەلگەها نێڤدەولەتى ب گشتى و هاریکاریکرنا ئیراقێ و هەرێمێ بۆ چارەسەرکرنا ئاریشەیێن رووبرووبوونا ئالنگاریێن دەربازکرنا قەیرانان هاتییەکرن، هەردوو ئالى هەڤرابوون کو ژ بۆى سەقامگیربوونا ئیراقێ پێدڤییە هەموو ئاریشە بهێنە چارەسەرکرن.
هەر د ئەوێ کۆمبوونێ دا سەرۆک نێچیرڤان بارزانى سەرەراى دەربرینا سوپاسییان بۆ هاریکاریێن ئەلمانییا و فەرەنسا بۆ هەرێما کوردستانێ و ئیراقێ، دووپاتى ل پێدڤییا هەرێما کوردستانێ و ئیراقێ ب هاریکاریێن جڤاکا نێڤدەولەتى بۆ چارەسەرکرنا ئاریشەیان و دەربازکرنا قەیرانان کریە و بەرهەڤییا هەرێما کوردستانێ بۆ رێککەفتنێ و چارەسەرییا ئێکجارییا هەموو ئاریشەیان ل گەل حکومەتا فیدرالا ئیراقێ ل سەر بنەمایێ دستورى نیشاندایە.
هەر د ئەوێ کۆمبوونێ دا کونسولێن گشتى یێن ئەلمانیا و فرەنسا ل هەرێما کوردستانێ و هژمارەکا دیپلۆماتکار و بەرپرسان ل سەرۆکاتی و حکومەتا هەرێما کوردستانێ بەرهەڤببون، چەندین بابەتێن کو جهێن گرنگییا هەردوو ئالییان بوون هاتنە باسکرن.
