شێخ عه‌لۆ خه‌له‌ف، زانایێ ئۆلا ئێزدیان بۆ خانی نیوز گۆت: جه‌ژنا خدرلیاس یا ئێزدیان ئه‌ڤ ساله دكه‌ڤیته رۆژا پێنچشه‌مبێ ل 18 یێ شوباتێ كو مێژوویا وان ڤه‌دگه‌ریته به‌ریا مووسا پێخه‌مبه‌ر و پشتی ئیبراهیم خه‌لیل هاتینه، خدر و لیاس ژی هه‌ردوان كه‌رامه‌ت و ایلهام ل نك وان هه‌بوو، ب هه‌لكه‌فتا رۆژا بوونا وان ئێزدی سێ رۆژان ب رۆژی دبن و رۆژا چارێ د رۆژا بوونا خدر و لیاس دا جه‌ژنه و چه‌ندین رێوره‌سمێن پیرۆز هه‌نه ژ وان:
قه‌لاتك، قه‌لاندنا ده‌خلودانی وه‌ك، گه‌نم، جه‌هـ، نۆك و تۆڤێ گولان ژ به‌ر كو داویا وه‌رزێ چاندنێ یه و تۆڤ ئێدی شین نابیت ژبه‌ر هندێ دبێژنێ خدرلیاس، سال خلاس.
پێخون، یانكو بێخون ژبه‌ر كو دڤێ جه‌ژنێ دا چ قوربانییان ناكوژن و خوین ناهێت رێژتن، پێخون ژ قه‌لاتكان دهێته چێكرن پشتی كو ل ئاش و ده‌ستاری دكه‌ن و دهێرن، پاشان وێ پێخونێ دناڤ دۆشابێ دا تێكه‌لدكه‌ن و سه‌ركێن خه‌بیسێ ژێ چێدكه‌ن و دبێژنێ، شرینیا جه‌ژنێ.
ژ كه‌ڤن دا كابانیا مالێ هنده‌ك ژ وێ پێخونێ ب شه‌ڤێ ل مال ددانیت و گه‌ر سپێدێ نیشان ل سه‌ر وێ پێخونێ هاتن دیتن رامانا وێ یه‌كێ یه كو خدر و لیاس قه‌ستا وێ مالێ كرییه و خێر و به‌ره‌كه‌ت دێ بۆ وێ مالێ چیت.
نێچیر د رۆژێن خدرلیاسێ دا گونه‌هه ژبه‌ر كو گیانه‌وه‌ر و ته‌رش و ته‌وال ب دوگیانن و نێچیرا وان گونه‌هه.
ژ كه‌ڤن دا د گۆتن، گه‌ر كچ و كوڕێن ئێزدییان ل ڤان رۆژان د خه‌ودا قه‌ستا ماله‌كێ بكه‌ن و ئاڤێ ژ ده‌نێ وێ مالێ ڤه‌خۆن ب رامانا وێ یه‌كێ یه كو دێ بن رسقێ وێ مالێ.
مه‌زارگه‌هێ خدرلیاس ل ناحیا باعه‌درێ یه‌و و ئێزدی د جه‌ژنێ دا قه‌ستا زیاره‌تێ كه‌ن و لێ زیاره‌تی دبن.
