سنێلەیی قوناغا پێگەھشتنا گەنجانە لێ ھندەک سنێلە د ڤی ژی دا لەزێ د دانا ھندەک بریاران دا دكەن کو دبنە ئەگەر پاشەرۆژا خوه تێک بدەن
حازم ئه‌حمه‌د ئێک ژ وان گەنجانە یێن د ژیێ سنێلەیێ دا ھەڤژینی پێک ئینایی بۆ خانى نیوز گۆت: د ژیێ شازدە سالیێ دا وى ھەڤژینی پێک ئینایە ئەڤە بۆ ماوێ دوو سالانە ئاریشە د ناڤبەرا وان دا پەیدابووینە، هه‌تا وی رادەی ئاریشه‌یا وان گەھشتییە بریارا ژئێک ڤەبوونێ.
ھەیفا سەدیق مافپەروەر و وبەرپرسا بەشی یاسا ل قایمقامییا قەزا دهۆکێ دیارکر : :یاسایا عیراقی یا ژماره ۱۸۸ یاکاروبارێن کەسایەتی ب ھیچ رەنگەکێ رێک نەدایە كو د ژیێ ھەژدە سالیێ دا کێمتر گرێبەستا ھەڤژینیێ بۆ بھێتە گرێدان، لێ ھەر د ھەمان یاسا دا رێک دایە پێكئینانا پرۆسه‌یا هه‌ڤژینیێ بۆ ژیێ پازدە سالیێ، لێ ب مەرجەکێ کو کارتێکرنێ ل سەر جڤاکی نەکەت.
ناڤهاتى گۆت ژى: ل گۆرێ وێ ھەرکەسەکێ پێچەوانەی ڤێ یاسایێ ب زۆری کچێ ب شوو بدەت، یان ئەگەر ب دەتە کەسەکێ نێزیک بۆ ماوێ سێ سالان دێ ھێتە زیندانکرن، و ئەگەر ب دەتە کەسەکێ بیانی بۆ ماوێ دەھ سالان دێ ھێتە زیندانکرن، هەروەسان ب کوژمەکێ پاران ژی دێ ھێتە سزادان.
ژلایه‌كێ دى ڤه شاکر بیلال شارەزایێ جڤاکی دیاركر: ھەڤژینی د ژیێ سنێلەیێ دا بێ گومان کاریگەریەکا نەرێنی یا هەی چونکی د ڤی تەمەنی دا ئه‌و نزانیت هەلبژارتنا دروست و پاشەرۆژا وان کیشکە و ب تنێ ل دووڤ حەزا خوه دچجیت بێ کو هزر تێدا بکەت كو ژیانا هەڤژینیێ بۆ هەتا هەتایێ یە وگهورین تێدا نینە، لەورا دڤێت هەلبژارتنا تە یا درست بیت، ژبەر هندێ رێژەیا (تەلاقێ) بەردانێ د ناڤ جڤاکێ مە دا بەرەڤ زێدەبوونێ چوویە، چونکی هەلبژارتنا وان د ڤی تەمەنی دا یێ سنێلەیێ یا شاشه و د ئێک دوو ناگەهن وئەڤە ژی دێ کاریگەرییەکا نەرێنی ل سەر جڤاکى دروست كه‌ت.
شاکر بیلال گۆت ژى: د ژیێ سنێله‌یێ دا دبیت ژبەر ئەگەرەکێ بچیک ژێک ڤەبوون چێبیت، یان ژلایێ جەستەی یان دەرونی ڤە ئامادە نەبن ژبۆ پێک ئینانا هەڤژینیێ، هەروەسا د ڤی تەمەنی دا گوهێ وان یێ ل ئاخفتنێن دەوروبەرێن وان و کارتێکرنەکا نەرێنی ل ژیانا وان یا هەڤژینیێ دکەت و بۆچوونێن ئەندامێن خێزانا خوه ل سەر پروسێسا هەڤژینیێ ناوەرگرن، ئەو ژی دبیتە ئەگەرەک بۆ نە سەرکەفتنا هەڤژینییا وان، هەروەسا رەوشا خێزانێ ژی دبیتە ئەگەرەک کو سنێله هزر ل پرۆسه‌یا هەڤژینیێ بکەن و هزر دکەن پێک ئینانا هەڤژینێ رزگار بوونە ژ وان ئاریشێن خێزانی یێ کەتینە تێدا، د وێ ژینگەها تێدا دژی.
خانی نیوز، مەنیجا ئەیوب
