پرۆژەقانوونا پەترۆل و غازێ گەھشتە جڤاتا وەزیران

وەزارەتا پەترۆلا ئیراقێ داوی رەشنڤیسا پرۆژەقانوونا پەترۆل و غازێ یا فیدرال رەوانەی جڤاتا وەزیران کر ب مەرەما پەسەندکرنێ و رەوانەکرنێ بۆ جڤاتا نوونەران.
ئحسان عەبدولجەبار ئسماعیل، وەزیرێ پەترۆلا ئیراقێ د بەیانەکێ دا راگەھاند، د کۆمبوونا دەستەیا وەزارەتا پەترۆلێ دا یا رۆژا چارشەمبی ھاتیە کرن، دانوستاندن و پێداچوون ل سەر داوی رەشنڤیسا پرۆژەقانوونا پەترۆل و غازێ یا فیدرال ھاتە کرن و بۆ جڤاتا وەزیران ھات رەوانەکرن.
وەزیرێ پەترۆلا ئیراقێ راگەھاند ژی، جڤاتا وەزیران دێ پێداچوونا وێ پرۆژەقانوونێ کەت و پاشی دێ رەوانەی جڤاتا نوونەران کەن.
ئحسان عەبدولجەبار ئسماعیل گۆت ژی: وەزارەتا پەترۆلێ رژدە ل سەر پەسەندکرنا وێ قانوونێ کو دێ بیتە ئەگەرێ گەشەپێدانا پیشەسازییا پەترۆلێ و وەبەرھێنانێ د سامانێ نشتیمانی دا.
پرۆژەقانوونا پەترۆل و غازێ ئێک ژ خالێن ناکوکییا ھەولێرێ و بەغدا یە کو ل سالا 2007ێ ھاتبوو بەرھەڤکرن، چەندین جاران ژی حکومەتا ھەرێمێ داخواز کرییە ئەو قانوون بھێت پەسەندکرن وەکو چارەیەک بۆ کێشێن د ناڤبەرا ھەولێرێ و بەغدا دا.