ئەڤرۆ پێنچشەمبی ۲٥ی شواتا ۲٠۲۱ ب ئامادەبوونا چەندین نڤیسەر و ڤەکۆلەر و پسپۆرێن د بیاڤێ ئەدەبی و جڤاکی دا ل هۆلا ئێکەتییا نڤیسەرێن کورد ل دهۆکێ د چالاکیەکێ دا گڕۆێ ( نووژەن) یێ رەخنەگرێن بەهدینان هاتە راگەهاندن.
د.نعمەت حامد نهێلی بسپور د بیاڤێ رەخنەیێ دا، د ڤێ چالاکیێ دا سمینارەک پێشکێشکر و تێدا نەخشە و پلانێن ڤی گڕۆپی دیارکرن کو ژ چەندین نڤیسەر و کەسێن بسپور د بیاڤێن جودا جودا پێک دهێت.
نهێلی ئەو یەکژی دیارکر کو ئەڤ گڕۆپە دێ ل ژێر دروشمێ “بەر ب رەخنەیەکا ئەکادیمی، ژبۆ دەولەمەندکرنا ئەدەب و هونەرێ کوردی” هاتییە پێکئنان کو ئەڤەژی چەندین کارنامەیان بخوەڤە دگریت وەکی:
خواندن و شروڤەکرن بو تێکستێن کوردی و رێنماییدان لسەر بەرهەمان، گرنگیدان ب ئەدەبیاتا فولکلورییا کوردی و یا کرمانجی ب تایبەتی ب ڕێکا ڤەکۆلین و شرۆڤەکرنێن رەخنەیی، ئەنجامدانا سمینار و وۆرکشۆپێن هەڤپشک بۆ ناساندنا فورم و شێوازێن جۆرێن ئەدەبی، گڕنگیدان ب بزاڤا وەرگێرانێ و ب تایبەتی وەرگێرانا میتودێن نوو یێن رەخنەیی و بەرهەمێن ب سەنگێن جیهانی، گڕنکیدان ب پرۆسێسا رەخنەگرتنێ د بیاڤێ هونەری دا، ئەرشیفکرن و بەردەستکرنا بەرهەمێ گڕۆپی بۆ وەرگری ب رێکا تەکنەلوژیایێ، هەڤکاریکرن ل گەل سازیێن رەوشنبیری و ئەکادیمی یێن گڕێدایی ب ئەدەبیاتی و هۆنەری ژبۆی پێشڤەبرنا رەخنەیێ، کارکرن بۆ گێرانا کۆنفرانس و ڤیستەڤالان و دامەزراندنا یانەیێن ئەدەبی و هونەری و دانا خەلاتەکێ تایبەت یێ سالانە.
هەروەسا ئەگەرێ دروستکرنا ڤی گڕۆپی دیارکر و گۆت، ئەدەبیاتا کوردی پێدڤی ب رەخنەیەکا ئەدەبی یا بهێز و کاریگەرە، و ئەو بزاڤێن رەخنەیی یێن هەیی، نە ل دووڤ حەز و پێدڤیێ نە، کو رەخنەیا نۆکە هێشتا ل سەر ئاستێ تاکێ دەربازی ناڤا گڕۆپێن تایبەت ب رەخنێ ڤە نەبوویە، و بەهرا پتر د چارچووڤێ رەخنەیەکا ئنتباعی و رووکەشی دابوویە، و دا کو رەوشا ئەدەبیاتێ ل دەڤەرێ ب شێوەیەکێ سیستەماتیک بکەڤتە دخانەیا پێشڤەبرنا لایەنێن ئەدەبی و رەخنەیی دا، ژبۆ مفا وەرگرتن ژ وەرارا ئەدەبیاتا جیهانی و میتودێن رەخنەیی یێن هەمەڕەنگ، ژبۆ گرنکی دانێ ب دیاردەیێن هزری، جڤاکی، رەوشنبیری و دیرۆکی بۆ سەرراستکرنا دیاردەیێن پاشکەفتی و دژیوارێ هەیی دا، لەورا ب هزرکرنەک کوور و ب پلان و پڕوگرامەک دەولەمەند، مە هزر د ناڤکرنا ئەڤی گڕۆپی داکر. کۆمەکا رەخنەگر و روشنبیرێن دەڤەرێ خوە نزیکی هەڤکرن، داکو شیانێن خوە تەرخانبکەن ژبۆ کارکرنا هەڤپشک د بیاڤێ رەخنەی دا. پشتی روینشتن ودانوستاندنێن درێژ، رێککەفتن هاتە کرن، کو کار و بزاڤێن خوە وەکو پێنگاڤا ئێکێ ل دەڤەرا بەهدینان دەستپێبکەین.
سەعد عاسف، خانی نیوز
