ئامیرێ پشکنینا ڤایرۆسێ کۆرۆنایا نوو گەهشتە دهۆکێ

پشتی دەرکەفتنا چەند حالەتێن ڤایرۆسێ کۆرۆنا نوو ل پارێزگەها دهۆکێ هاتینە راگەهاندن، ئەڤرو ئامیرێ پشکنینا ڤایرۆسێ نوو گەهشتە دهۆکێ.

هەمزە رەزیکی: بەرپرسێ ڕاگەهاندنا ڕێڤەبەرییا گشتییا ساخلەمییا پارێزگەها دهۆکێ، بۆ خانی نیوز گۆت، پشتی بۆ مە هندەک گومان ل سەر چەند کەسێن پارێزگەها دهۆکێ و هندەک ژ گەشتیارێ کو ژ ژدەرڤەی وەلاتی هاتین دروست بووین، کو تووشی ڤایرۆسێ نوو یێ کۆرۆنایا نوو بووینە، وان هندەک نموونە ژێ وەرگرتبوون و فرێکربوونە تاقیگەها مەلبەندی ل باژێرێ هەڤلێرێ بۆ دیار کرنا جۆرێ دروست یێ ڤی ڤایرۆسی، پشتی حەفتیەکێ کو ئەنجام گەهشتین دیاربوو ژ سەرجەمێ 16 پشکنینان 14 ژ وان کەسان تووشی ڤایرۆسێ خوه‌ گهور یێ کۆرۆنا نوو ببوون.

هەمزە ره‌زیكى زێدەتر گۆت، نوکە ل دهۆکێ مە ئامیرێ دەستنیشانکرنا ڤایرۆسێ نوو یێ کۆرۆنایێ هەیە، ئێدی هەر گومانەکا وان ل سەر هەر کەسەکێ هەبیت، ئەم دێ شێن ل دهۆکێ پشکنینان بۆ کەن، ئەڤ ئامیرە بۆ پارێزگەها دهۆکێ و گشت قەزا و ناحیێن ب سەر ب دهۆکێ ڤەیە، و د شیان دایە رۆژانە زێدەتری 400 پشکنینان ب ڤی ئامیرەی بهێنە ئەنجام دان.

ل دۆر رەوشا ساخلەمییا پارێزگەها دهۆکێ بەرپرسێ راگەهاندنا ساخلەمیێ دیارکر، پشتی دەرکەفتنا ڤایرۆسێ كۆرۆنایا نوو، پێشبینی دکەین رەوش ل دهۆكێ ئاڵوز ببیت، لەورا پێدڤییە خەلک یێ هاریکار بیت، راستە ل سەر حکومەتێ ئەرکە ڤاکسینان بو خەلکێ مە پەیدا بکەت لێ یا ژ هەمیێ گرنگتر ئەوە کو خەلک خوه‌ ب پارێزیت، چونکە خوه‌ پاراستنا خەلکی و توندکرنا رێنمایان و بەستنا کەمامێ ل جهێن گشتی، هاریکارێن سەرەکینە وەکی ڤاکسینەکێ خەلک بشێتن خوه‌ ژ ڤی ڤایرۆسی ب پارێزیت.

خانی نیوز، مەتین عومەر