شیروان میرزا: گیرۆبوونا رێككه‌فتنێ په‌یوه‌ندى ب كوردان ڤه‌ نینه‌

ئه‌ندامێ لیژنا دارایى ل په‌رله‌مانێ ئیراقێ دیاركر كو پرۆژه‌ یاسایا بودجه‌ى ل جڤاتا نوونه‌رێن ئیراقێ بێى كورد ده‌نگدان ل سه‌ر ناهێته‌ كرن، و گۆت ژى و هه‌ر ده‌مێ ئه‌و چه‌نده‌ چێبوو، پرۆژه‌ ده‌نگان ب ده‌ستڤه‌ نائینیت بۆ ده‌نگدانێ ل سه‌ر پرۆژه‌یى.

شیروان میرزا، دیار كر ژى كو ده‌لیڤا گه‌هشتنا رێككه‌فتنێ د ناڤبه‌را هه‌ولێرێ و به‌غدایێ هه‌یه‌ و ئه‌و ژێ د پشت راستن و كه‌ش و هه‌وا ژى یێ ئه‌رینى یه‌، و ئاشكرا ژى كر كو گیرۆبوونا رێككه‌فتنێ په‌یوه‌ندى ب كوردانڤه‌ نینه‌ به‌لكو په‌یوه‌ندى یا ب لایه‌نێن دى ڤه‌ هه‌ین، و هه‌تا نوكه‌ ژى كوتلا شیعى چ پێشنیار سه‌باره‌ت پشكا هه‌رێما كوردستانێ د بودجه‌ی دا پێشكێشنه‌كرینه‌، و ئه‌و یێن ل هیڤیا وان لایه‌نان كو بگه‌هنه‌ رێكه‌فتنێ.

 شیروان میرزا ئه‌ندامێ لیژنا دارایى ل په‌رله‌مانێ ئیراقێ، ئاشكرا ژى كر، كو چێدبیت لایه‌نێن شیعى ئه‌ڤرۆ یان سوبه‌هى پێشنیارا خوه‌ یا داوى سه‌باره‌ت پشكا هه‌رێما كوردستانێ بهێته‌ دان، و دووپات ژى كر كو حكومه‌تا هه‌رێما كوردستانێ یا پیگیره‌ ب ره‌شنڤیسا پرۆژه‌ یاسایا بودجێ و دانا 250 هزار به‌رمیلان ژ نه‌فتا كۆمپانییا سومۆ.